اتىراۋدا قانت ساۋداسىنا شەكتەۋ قويىلدى. ءار تۇتىنۋشى ەندى 3 كەلىدەن ارتىق ساتىپ الا المايدى، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.
بۇل جاعداي مۇنايلى ءوڭىر تۇرعىندارىنىڭ اراسىندا قىزۋ تالقىعا ءتۇسىپ جاتىر. ءتىپتى ايلاعا كوشىپ، ءبىر ادام ساۋدا نۇكتەسىنەن ءبىر كۇندە بىرنەشە رەت قانت ساتىپ العانى انىقتالعان. ەندى تۇرعىندار قانتتى تەك شەكتەۋلى مولشەردە عانا الا الادى. مينيسترلىكتىڭ ءوزى تاپشىلىق بار ەكەنىن جاسىرماي وتىر. وسىنداي قىسىلتاياڭ ۋاقىتتا قالتانىڭ قامىن ويلاپ، ايلاعا باسقاندار دا بار. ءبىر ادامنىڭ 1 كۇن ىشىندە قالاداعى ساۋدا نۇكتەلەرىنىڭ بىرىنەن 18 رەت قانت ساتىپ العانى انىقتالدى.
«ءبىز بەينەباقىلاۋ كامەرالارى ارقىلى تەكسەرۋ جۇرگىزگەنبىز. 1 ادامنىڭ سۋپەرماركەتكە 18 رەت كەلىپ، قانت العانىن انىق بايقادىق. ولار وسى جەردەن ارزان باعادا ساتىپ الىپ، كەيىن ونى قىمباتقا ساۋدالايدى. الىپ-ساتارلاردىڭ ايلاسىن جۇزەگە اسىرماۋ ءۇشىن، ەندى سۋپەرماركەت سورەلەرىنە قانت بەلگىلى ءبىر ۋاقىتقا عانا شىعارىلادى. ءتىپتى رەيدتىك شارالار دا قولعا الىنباق»،– دەدى قالالىق كاسىپكەرلىك جانە اۋىل شارۋاشىلىعى ءبولىمى باسشىسىنىڭ ورىنباسارى التىناي ەرۋباەۆا.
ساۋدا جانە ينتەگراتسيا مينيسترلىگى رەسەي فەدەراتسياسىنىڭ قانت ەكسپورتىنا سالعان تىيىمىنىڭ كەسىرىنەن تاپشىلىق تۋىپ وتىر دەيدى. مينيسترلىكتىڭ مالىمەتىنشە، ەندى 31 تامىزعا دەيىن ەلىمىزگە 350 مىڭ توننا كولەمىندە قانت جەتكىزۋ جوسپارلانىپ وتىر.
