قازاقستان رەسپۋبليكاسىنىڭ سەناتورلارى الماتىداعى جوعارى وقۋ ورىندارىنىڭ ۇجىمدارىمەن كەزدەستى، دەپ حابارلايدى “ادىرنا” ۇلتتىق پورتالى.
كەزدەسۋدىڭ باستى ماقساتى ەلىمىزدە 5 ماۋسىمدا وتەتىن رەسپۋبليكالىق رەفەرەندۋمدى ءتۇسىندىرۋ، وسى تاقىرىپ اياسىندا پىكىر الماسۋ بولدى.
جالپىحالىقتىق سيپات الاتىن ساياسي ناۋقان بارىسىندا سەناتورلار قازاقستان ينجەنەرلىك-تەحنولوگيالىق ۋنيۆەرسيتەتىنە دە ارنايى كەلدى. ولاردىڭ قاتارىندا سەنات دەپۋتاتتارى باقىتجان جۇماعۇلوۆ، دينار نۇكەتاەۆا، تالعات مۇساباەۆ، نۇرتورە ءجۇسىپ, سۇلتانبەك ماكەجانوۆ جانە «تۇران» ۋنيۆەرسيتەتىنىڭ رەكتورى، الماتى قالاسى قوعامدىق كەڭەسىنىڭ توراعاسى، قازاقستان رەسپۋبليكاسى جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ بار. كەزدەسۋدە قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا 5 ماۋسىمدا وتەتىن رەفەرەندۋمنىڭ ەل تاريحىنداعى ماڭىزدىلىعىنا توقتالىپ، كونستيتۋتسياعا وزگەرىستەر مەن تولىقتىرۋلار ەنگىزۋ جونىندە رەفەرەندۋم دەموكراتيالىق جولدىڭ ايقىن كورءىنىسى دەگەن پىكىرىن جەتكىزدى. ەل بولاشاعىندا ماڭىزدى ورىن الاتىن رەفەرەندۋم جايلى كەزدەسۋ وتكىزۋگە ارنايى كەلگەن قوناقتارعا العىسىن ءبىلدىردى.
«قازيتۋ ۇجىمىنىڭ جاڭا قازاقستاندى قۇرۋ جولىنداعى دەموكراتيالىق وزگەرىستەر ءۇشىن جاۋاپتى كەزەڭدى زور تۇسىنىكپەن قابىلدايدى. مەملەكەتباسشىسىنىڭ قازاقستان كونستيتۋتسياسىنا وزگەرىستەر مەن تولىقتىرۋلار ەنگىزۋ بويىنشا رەسپۋبليكالىق رەفەرەندۋم وتكىزۋ تۋرالى باستاماسىن قولدايدى. رەفەرەندۋم قوعامنىڭ دەموكراتيالىق پروتسەستەرگە ارالاسۋىنا، جاڭا قازاقستاندى قۇرۋ جولىنداعى دەموكراتيالىق وزگەرىستەرگە جول اشۋعا ۇلكەن مۇمكىندىك»، - دەيدى رەكتور گۇلنار الىبەكقىزى.
قازاقستان رەسپۋبليكاسىنىڭ سەناتورلارى ءبىلىم ورداسىمەن تانىسىپ, بولاشاق مامانداردى دايارلاپ جاتقان جوعارى وقۋ ورنىنىڭ ۇجىمىمىن كەڭەسىپ, رەفەرەندۋم جايلى ءتۇسىندىرۋ جۇمىستارىن جۇرگىزدى. ۋنيۆەرسيتەتتىڭ تەحنيكالىق، بازالىق جابدىقتالۋىمەن تانىسىپ, ستۋدەنت جاستارعا مىقتى مامان بولۋدى تىلەدى.
سەنات دەپۋتاتتارى كونستيتۋتسياعا ۇسىنىلىپ وتىرعان وزگەرىستەر مەن تولىقتىرۋلار قازاقستاننىڭ ءاربىر ازاماتىنىڭ نەگىزگى قۇقىقتارى مەن كەپىلدىكتەرىن, قوعامداعى تۇراقتىلىق پەن بىرلىكتى قورعاۋعا باعىتتالعانىن بايانداپ, مۇنداي رەفەرەندۋمدا بەلسەندىلىك تانىتۋعا، جاڭا قازاقستاندى قۇرۋدان تىس قالماۋعا ۇندەدى. تاۋەلسىز قازاقستان تاريحىندا ورىن العالى وتىرعان ساياسي وزگەرىستەردى بىرگە جاساۋعا شاقىردى.
”ادىرنا” ۇلتتىق پورتالى
