سەنات توراعاسى: قازاقستاندىقتاردىڭ 92 پايىزى ورىس، 86 پايىزى قازاق ءتىلىن بىلەدى

2462
Adyrna.kz Telegram

قازاقستاندا قازاق ءتىلىن بىلەتىن حالىق ۇلەسى 86 پايىزعا جەتتى. بۇل تۋرالى قر پارلامەنتى سەناتىنىڭ توراعاسى ماۋلەن اشىمباەۆ ايتتى، دەپ حابارلايدى “ادىرنا” ۇلتتىق پورتالى قازاقپارات سايتىنا سىلتەمە جاساپ.

«ەكونوميكالىق جانە الەۋمەتتىك جاڭعىرۋدىڭ الەۋمەتتىك بازاسى جانە قوزعاۋشى كۇشى رەتىندە ورتا ساناتتىڭ قالىپتاسۋى دا ماڭىزدى وزگەرىس سانالادى. تاۋەلسىزدىك جىلدارىنىڭ ىشىندە ازاماتتارىمىزدىڭ ورتاشا تابىسى 13 ەسەدەن استامعا ارتقانىن ايتساق دا جەتكىلىكتى. كاسىپكەرلەر قاتارى دا ارتىپ كەلەدى. جەكە بيزنەستە جۇمىس ىستەپ تۇرعان سۋبەكتىلەر سانى 2021 جىلدىڭ 1 قاڭتارىندا 1,4 ملن-دى قۇرادى. 2005 جىلدان باستاپ بۇل ءۇش ەسەگە جۋىق ءوسىمدى قۇرايدى»، - دەدى سەنات سپيكەرى قازاقستان الەۋمەتتانۋشىلارىنىڭ VII كونگرەسىندە.

ونىڭ اتاپ وتۋىنشە، ۋربانيزاتسيا قازاقستاندىق قوعامنىڭ الەۋمەتتىك ستراتيفيكاتسياسىنا ىقپال ەتەتىن ماڭىزدى ترەندتەردىڭ ءبىرى سانالادى. تاۋەلسىزدىك جىلدارى قالا حالقىنىڭ سانى 9 ملن-نان 11 ملن-عا دەيىن ارتىپ وتىر.

«30 جىلدىڭ ىشىندە ەلدىڭ دەموگرافيالىق بەيىنى، حالىقتىڭ ەتنيكالىق قۇرامى وزگەرىپ، جاڭا تىلدىك ورتا قالىپتاستى. قازاق ءتىلىن بىلەتىن حالىقتىڭ ۇلەسى 86 پايىزعا جەتتى. بۇل رەتتە قازاقستاندىقتاردىڭ 92 پايىزى ورىس ءتىلىن بىلەدى. ءبىز – جاس ۇلتپىز. قازاقستاندىقتاردىڭ ورتاشا جاسى شامامەن 32-ءنى قۇرايدى. سونىمەن قاتار ءومىر ءسۇرۋ ۇزاقتىعى دا ۇزارىپ كەلەدى»، - دەدى ماۋلەن اشىمباەۆ.

”ادىرنا” ۇلتتىق پورتالى

پىكىرلەر