قر اۋىل شارۋاشىلىعى مينيسترلىگى "قتج" ۇك" اكتسيونەرلىك قوعامىمەن ەل ايماقتارىن قانت پەن قانت ونىمدەرىن كەدەرگىسىز جەتكىزۋ ماسەلەسىن شەشتى. جەرگىلىكتى بيلىككە جەتكىزىلگەن ءونىمدى جەدەل قابىلداپ، تاراتۋدى قامتاماسىز ەتۋدى ۇسىندى، دەپ حابارلايدى "ادىرنا" ۇلتتىق پورتالى.
قر اۋىل شارۋاشىلىعى مينيسترلىگى ءباسپاسوز قىزمەتىنىڭ حابارلاۋىنشا "قتج" ۇك" اق-مەن كەلىسىم بويىنشا 28 مامىردان باستاپ ەل ايماقتارىنا ءۇزىلىسسىز جەتكىزۋ ءۇشىن قانت تيەلگەن ۆاگونداردىڭ وتۋىنە ەرەكشە باقىلاۋ ورناتىلدى.
"قازىرگى تاڭدا قازاقستان اۋماعى بويىنشا تەمىرجول ارقىلى 152 ۆاگون قانت تاسىمالدانادى. سونداي-اق وڭدەۋگە ارنالعان 116 ۆاگون قانت قۇراعى شيكىزاتى تەمىرجول ارقىلى جەتكىزىلەدى. وتاندىق زاۋىتتار تاريفتىك جەڭىلدىكپەن ءۇشىنشى ەلدەردەن جەتكىزىلەتىن شيكى قۇراق قانتتان قانت وندىرەدى", - دەلىنگەن اۋىل شارۋاشىلىعى مينيسترلىگى تاراتقان حابارلامادا.
وبلىس اكىمدىكتەرىنە جەتكىزىلگەن قانتتى جەدەل قابىلداپ، تاراتۋدى قامتاماسىز ەتۋ ۇسىنىلادى.
"وتاندىق زاۋىتتاردا قانت ءوندىرىسى توقتامايدى. ونى ايماقتارعا ۇزدىكسىز جەتكىزۋ جۇزەگە اسىرىلۋدا. ءونىم قورى ۇنەمى تولىقتىرىلىپ وتىرادى", - دەپ اتاپ ءوتتى اۋىل شارۋاشىلىعى مينيسترلىگىنىڭ ءباسپاسوز قىزمەتى.
قازاقستاندا قانتقا دەگەن شەكتەن تىس سۇرانىس وسى جىلدىڭ ناۋرىز ايىندا رەسەي بيلىگى ەكونوميكالىق سانكتسيالارعا بايلانىستى ەلدەن جارتى جىلعا قانت ەكسپورتىنا تىيىم سالعانىن جاريالاعاننان كەيىن باستالعان.
كوپتەگەن قازاقستاندىقتار بۇدان سوڭ قانتتى ساۋدا نۇكتەلەرىنەن ساتىپ الۋعا اسىقتى. بۇل شاعىن دۇكەندەر مەن ءىرى ساۋدا جەلىلەرىندە ءونىم باعاسىنىڭ وسۋىنە جانە ونىڭ جەتكىلىكسىز سانىنا اكەلىپ قانا قويماي سونىمەن قاتار ساتۋشىلاردى تاۋاردى ءبىر ادامعا ساتۋدى شەكتەۋگە ءماجبۇر ەتتى.
"ادىرنا" ۇلتتىق پورتالى
