قازاقستاننىڭ تۇڭعىش پرەزيدەنتى نۇرسۇلتان نازارباەۆ ساياساتكەر دانيار اشىمباەۆقا بەرگەن سۇحباتىندا وتستاۆكاعا كەتكەننەن كەيىن نەمەن اينالىسىپ جۇرگەنىن ايتتى، دەپ حابارلايدى “ادىرنا” ۇلتتىق پورتالى.
"جالپى ساياساتكەردىڭ وتستاۆكاعا كەتكەننەن كەيىن نەمەن اينالىساتىنى ماڭىزدى ەمەس دەپ سانايمىن. ساياساتكەرلەر كەلەدى، كەتەدى، ال حالىق پەن ەل قالادى. بۇدان گورى ەلىمىزدىڭ ودان ءارى قالاي داميتىنى جانە الدىمىزدا قانداي وزگەرىستەر كۇتىپ تۇرعانى ماڭىزدىراق", - دەدى نازارباەۆ ساياساتتانۋشى دانيار اشىمباەۆقا بەرگەن سۇحباتىندا.
تۇڭعىش پرەزيدەنت ەل باسقارعان جىلدارى بارلىق كورشىمەن، باتىس الەمىنىڭ ەلدەرىمەن سەنىمگە نەگىزدەلگەن قارىم-قاتىناس ورناعانىن اتاپ ءوتتى.
“قازاقستاندى حالىقارالىق ساياسي ارەنادا قۇرمەتتەيدى. قازاقستاندىقتار شەتەلگە دەمالۋعا نەمەسە ىسكەرلىك ساپارعا ەمىن-ەركىن شىعادى. ولارعا ءاردايىم قۇرمەتپەن قارايدى. قازاقستاندىقتار شەتەلدەن جۇمىس ىزدەمەيدى. مەنىڭ وتستاۆكامنان كەيىن كەزىندە بىرگە ىستەگەن كوپتەگەن مەملەكەتتىڭ ليدەرى ماعان حابارلاسىپ، ءوز ەلدەرىنە قوناققا شاقىردى. مەن ولاردىڭ بارىنە ريزامىن. كەيبىرىمەن ءالى كۇنگە دەيىن بايلانىسىمىز ۇزىلگەن جوق", - دەيدى ول.
نازارباەۆ ەۋرازيالىق ەكونوميكالىق وداق، تۇركى مەملەكەتتەرى ۇيىمىنىڭ قۇرمەتتى توراعاسى ەكەنىن ەسكە سالدى. ءوزى قۇرعان قوردىڭ جۇمىسىنا دا كوڭىل ءبولۋ قاجەت ەكەنىن ايتتى. سونداي-اق جاھاندىق يادرولىق قاۋىپسىزدىك ماسەلەلەرى دە نازاردان تىس قالماعانىن اتاپ ءوتتى.
"بۇعان قوسا ءوز ءومىرىم مەن قىزمەتىم جايلى ەستەلىكتەرمەن جۇمىس ىستەپ جاتىرمىن. بۇگىندە مەنىڭ ويىم دا، تىلەگىم دە – قازاقستاننىڭ تۇراقتىلىعى مەن گۇلدەنۋى جايلى. ءبىزدىڭ ۇرپاعىمىز بىزدەن دە كوپ ءىس تىندىرعانىن قالايمىن. ولارعا شىن جۇرەكتەن بۇل ىستە تابىس تىلەيمىن", - دەپ تۇيىندەدى نازارباەۆ.
“ادىرنا” ۇلتتىق پورتالى
