Qazaqstannyń tuńǵysh prezıdenti Nursultan Nazarbaev saıasatker Danııar Áshimbaevqa bergen suhbatynda otstavkaǵa ketkennen keıin nemen aınalysyp júrgenin aıtty, dep habarlaıdy “Adyrna” ulttyq portaly.
"Jalpy saıasatkerdiń otstavkaǵa ketkennen keıin nemen aınalysatyny mańyzdy emes dep sanaımyn. Saıasatkerler keledi, ketedi, al halyq pen el qalady. Budan góri elimizdiń odan ári qalaı damıtyny jáne aldymyzda qandaı ózgerister kútip turǵany mańyzdyraq", - dedi Nazarbaev saıasattanýshy Danııar Áshimbaevqa bergen suhbatynda.
Tuńǵysh Prezıdent el basqarǵan jyldary barlyq kórshimen, batys áleminiń elderimen senimge negizdelgen qarym-qatynas ornaǵanyn atap ótti.
“Qazaqstandy halyqaralyq saıası arenada qurmetteıdi. Qazaqstandyqtar shetelge demalýǵa nemese iskerlik saparǵa emin-erkin shyǵady. Olarǵa árdaıym qurmetpen qaraıdy. Qazaqstandyqtar shetelden jumys izdemeıdi. Meniń otstavkamnan keıin kezinde birge istegen kóptegen memlekettiń lıderi maǵan habarlasyp, óz elderine qonaqqa shaqyrdy. Men olardyń bárine rızamyn. Keıbirimen áli kúnge deıin baılanysymyz úzilgen joq", - deıdi ol.
Nazarbaev Eýrazııalyq ekonomıkalyq odaq, Túrki memleketteri uıymynyń qurmetti tóraǵasy ekenin eske saldy. Ózi qurǵan qordyń jumysyna da kóńil bólý qajet ekenin aıtty. Sondaı-aq jahandyq ıadrolyq qaýipsizdik máseleleri de nazardan tys qalmaǵanyn atap ótti.
"Buǵan qosa óz ómirim men qyzmetim jaıly esteliktermen jumys istep jatyrmyn. Búginde meniń oıym da, tilegim de – Qazaqstannyń turaqtylyǵy men gúldenýi jaıly. Bizdiń urpaǵymyz bizden de kóp is tyndyrǵanyn qalaımyn. Olarǵa shyn júrekten bul iste tabys tileımin", - dep túıindedi Nazarbaev.
“Adyrna” ulttyq portaly
