«AMANAT» پارتياسىنىڭ اتقارۋشى حاتشىسى اسحات ورالوۆ باتىس قازاقستان وبلىسىندا پارتيانىڭ سايلاۋالدى باعدارلاماسىنىڭ اۋىلدىق ەلدى مەكەندەردە ورىندالۋ بارىسىن تەكسەردى. ال ورالدا پارتيا اكتيۆىمەن جانە زيالى قاۋىم وكىلدەرىمەن بىرقاتار كەزدەسۋلەر وتكىزىپ، الداعى رەفەرەندۋمنىڭ ماڭىزىن تالقىلادى.
تەرەكتى اۋدانى ماگيسترالنوە اۋىلىنىڭ تۇرعىندارى بىرنەشە جىلدان بەرى ەلدى مەكەنگە كىرەر جولدىڭ ساپاسىنا شاعىمدانىپ كەلەدى. بۇل ماسەلە پارتيانىڭ 2021 جىلعا ارنالعان اۋداندىق سايلاۋالدى باعدارلاماسىن ىسكە اسىرۋعا ارنالعان جول كارتاسىنا ەنگىزىلدى. الايدا جەرگىلىكتى اتقارۋشى ورگان وسى ماقساتقا بيۋدجەتتەن قاراجات بولمەگەن.
جەرگىلىكتى تۇرعىندارمەن كەزدەسۋ بارىسىندا اسحات ورالوۆ پارتيانىڭ وبلىستىق فيليالى ماسليحاتتاعى «AMANAT» فراكتسياسىنىڭ دەپۋتاتتارىمەن بىرلەسىپ، بيىلعى بيۋدجەتتى ناقتىلاۋ كەزىندە وسى ماسەلەنى شەشۋگە قاراجات ءبولۋدى قامتاماسىز ەتكەنىن جەتكىزدى. جەرگىلىكتى اتقارۋشى ورگان وكىلدەرىنىڭ مالىمەتىنشە، جىل سوڭىنا دەيىن جولدىڭ 1,8 شاقىرىمى جوندەلەدى.
بۇدان سوڭ «AMANAT»-تىڭ اتقارۋشى حاتشىسى تەرەكتى اۋىلىنداعى ءبىر اۋىسىمدا 200 ادام قابىلدايتىن اۋداندىق ەمحانانىڭ قۇرىلىسىمەن تانىستى. قازىر مەديتسينالىق مەكەمە ورنالاسقان عيمارات 1972 جىلى قوناق ءۇي كەشەنى رەتىندە پايدالانۋعا بەرىلگەن.
«تۇرعىنداردىڭ تالاپ-تىلەگىنە سايكەس، جاڭا عيماراتتىڭ قۇرىلىسى پارتيانىڭ سايلاۋالدى باعدارلاماسىنا ەنگىزىلگەن. بۇل الەۋمەتتىك ماڭىزدى نىسان بولعاندىقتان، ماجىلىستەگى «AMANAT» فراكتسياسىنىڭ دەپۋتاتتارى مەن ۇكىمەت مۇشەلەرى بىرلەسىپ، قۇرىلىستىڭ مەرزىمى مەن ساپاسىن تۇراقتى باقىلاۋعا الادى. ول اياقتالعاننان كەيىن تەرەكتى اۋدانىنىڭ 40 مىڭعا جۋىق تۇرعىنى ساپالى مەديتسينالىق قىزمەتكە قول جەتكىزەدى», - دەدى اسحات ورالوۆ.
وسى كۇنى ورال قالاسىندا پارتيانىڭ اتقارۋشى حاتشىسى دارىندى بالالارعا ارنالعان №8 وبلىستىق مامانداندىرىلعان مەكتەپ ۇجىمىمەن جانە وقۋشىلاردىڭ اتا-انالارىمەن كەزدەستى.
2019 جىلى مەكتەپ عيماراتى اپاتتى دەپ تانىلىپ، وقۋشىلار №37 ورتا مەكتەپكە اۋىستىرىلعان. اتا-انالاردىڭ ايتۋىنشا، بۇل جاعداي قولايسىزدىق تۋعىزىپ، وقۋ پروتسەسىنە دە كەرى اسەر ەتىپ وتىر. اكىمدىكتىڭ مالىمەتى بويىنشا، وتكەن جىلى عيماراتقا كۇردەلى جوندەۋ جۇرگىزۋگە جوبالىق-سمەتالىق قۇجاتتاما ازىرلەنگەن. الايدا وبلىستىق بيۋدجەتتىك كوميسسيا ءوتىنىمدى قولدامادى. بۇل ماسەلە ەندى پارتيالىق باقىلاۋدا جانە جۋىق ارادا شەشىمىن تابادى.
ورالداعى زيالى قاۋىم وكىلدەرىمەن كەزدەسۋدە اتقارۋشى حاتشى «AMANAT» پارتياسى كونستيتۋتسياعا ەنگىزىلەتىن وزگەرىستەر مەن تولىقتىرۋلاردىڭ ماڭىزدىلىعىن تەرەڭ تۇسىنە وتىرىپ، الداعى رەفەرەندۋمدى وتكىزۋدى تولىق قولدايتىنىن اتاپ ءوتتى.
كەزدەسۋگە قاتىسۋشىلار دا جالپىحالىقتىق رەفەرەندۋم وتكىزۋدى قولداپ، ايماق تۇرعىندارىنىڭ وعان بەلسەندى قاتىساتىنىنا سەنىم ءبىلدىردى.
«اتا زاڭىمىزدىڭ ۇشتەن ءبىر بولىگىنە وزگەرىستەر مەن تولىقتىرۋلار ەنگىزىلگەلى وتىر. وتانداستارىمىز وسى ساياسي وقيعانىڭ ءمان-ماڭىزىن ءتۇسىنىپ، وزدەرىنىڭ ازاماتتىق ۇستانىمىن كورسەتەتىنىنە سەنىمدىمىن», - دەدى م.وتەمىسوۆ اتىنداعى باتىس قازاقستان ۋنيۆەرسيتەتىنىڭ پروفەسسورى قۋاندىق ءمادىر.
ءوز كەزەگىندە پارتيا ارداگەرى نۇرزيا سيسەنباەۆا الداعى رەفەرەندۋم ەل دامۋىنىڭ جاڭا مۇمكىندىكتەرىنە جول اشاتىنىن اتاپ ءوتتى.
«ءبىز پرەزيدەنت قاسىم-جومارت توقاەۆتىڭ توڭىرەگىندە توپتاسىپ، قوعام بولىپ بىرىگۋىمىز كەرەك. جاڭا كونستيتۋتسيا «جاڭا قازاقستانعا» باستايتىن وزىندىك جول بولاتىنىنا جانە قازاقستاندىقتاردىڭ بۇكىلحالىقتىق رەفەرەندۋمعا بەلسەندى قاتىساتىنىنا سەنىمدىمىن», - دەدى نۇرزيا سيسەنباەۆا.
سونداي-اق، ورال قالاسىندا «AMANAT» وبلىستىق اكتيۆىنىڭ جينالىسى ءوتىپ، وندا پارتيانى ترانسفورماتسيالاۋ جانە جوبالاردى ءتيىمدى جۇزەگە اسىرۋ ماسەلەلەرى تالقىلاندى. بۇگىندە وڭىردە 26 مىڭنان استام اماناتتىقتى بىرىكتىرەتىن 219 باستاۋىش پارتيا ۇيىمى جۇمىس ىستەيدى.
