بۇدان بىلاي ەلىمىزدە قولدانىلاتىن ءموبيلدى قوسىمشالاردان قازاق تىلىندە قىزمەت كورسەتۋ تالاپ ەتىلمەك. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين مالىمدەدى، دەپ حابارلايدى "ادىرنا" ۇلتتىق پورتالى "Ulysmedia.kz"-كە سىلتەمە جاساپ.
"بۇعان بۇرىن ءمان بەرمەۋشى ەدىك. تەك قانا مەملەكەتتىك ورگانداردىڭ سايتتارىنا، پورتالدارىنا نازار اۋدارىپ كەلدىك. ولاردى ماجبۇرلەپ، قازاق تىلىنە اۋدارتتىق. بىراق ولاردىڭ دا ساپاسى تومەن ەكەنىن بىلەمىز. قازىر جاقسارتىپ جاتىرمىز. ولارعا تالاپ قويىلدى، جۇمىس جۇرگىزىلىپ جاتىر", – دەپ مالىمدەدى مينيستر اقتوبە وبلىسىنىڭ تۇرعىندارىمەن كەزدەسۋدە.
ءمۋسيننىڭ ايتۋىنشا، Facebook سىندى جەكەمەنشىك سەرۆيستەردەن قازاق تىلىندە جۇمىس ىستەۋىن تالاپ ەتە المايدى. ەگەر قازاق ءتىلىنىڭ جوقتىعىنا بايلانىستى سەرۆيستى ەلدە جاۋىپ تاستاسا، تۇرعىندار نارازى بولۋى مۇمكىن.
"بۇل – نارىق. سوندىقتان وسى ساتىدا قازىر امەريكاعا بارماي-اق قويايىق، جانىمىزداعى سەرۆيستەر – 2گيس، ياندەكس بولسىن، سولارعا شىعىپ، وسىنداي تالاپتاردى قويىپ جاتىرمىز. ء"بىزدىڭ ەكونوميكادا جۇمىس ىستەگىڭىز كەلسە، وندا قازاق ءتىلىن ەنگىزەسىز" دەگەن تالاپ قويامىز. سونداي ۇسىنىستاردى تالقىلاۋدامىز", – دەدى مينيستر.
"ادىرنا" ۇلتتىق پورتالى
