مىڭ ءبىر زياتكەرلىك دومبىرا گيننەسس كىتابىنا رەكورد ورناتتى

1580

ەلورداداعى فيزيكا-ماتەماتيكا باعىتىنداعى زياتكەرلىك مەكتەپتە بيىلعى وقۋ جىلى ايتۋلى جانە كوپتەن كۇتكەن وقيعا – دومبىرا ساباعىمەن اياقتالدى، ونى گيننەسس رەكوردتار كىتابىنا «ەڭ اۋقىمدى دومبىرا ساباعى» اتاۋىمەن ونلاين تىركەۋ جوسپارلانىپ وتىر. قازاق حالقىنىڭ باستى مۋزىكالىق اسپابىندا ءبىر مەزگىلدە مىڭ وقۋشى وينادى.

ەڭ اۋقىمدى دومبىرا ساباعىنا قوسىمشا ءبىلىم بەرۋ پەداگوگى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى ايتجان توقتاعان ديريجەرلىك ەتتى. مىڭداعان وقۋشىنىڭ ورىنداۋىندا «سارىارقا»، «بالبىراۋىن»، «ەركەم-اي»، «كەڭەس»، «جاستار ءبيى» سىندى اتاقتى كۇيلەر كۇمبىرلەپ، تۋىندىلاردىڭ شىعۋ تاريحى باياندالدى.

ەلورداداعى فيزيكا-ماتەماتيكا باعىتىنداعى زياتكەرلىك مەكتەپ وقۋشىلارى بۇكىل الەمگە ءبىزدىڭ ەلىمىز بەن مادەنيەتىمىزدى، حالىقتىڭ جانى دەپ اتاۋعا بولاتىن باستى مۋزىكالىق اسپاپتى تانىستىردى. ناعىز قازاق – دومبىرا ەكەنىن ءبارىمىز جاقسى بىلەمىز، سوندىقتان بۇگىنگى كۇندى تاريحي دەپ اتاۋعا بولادى، – دەپ مويىندادى «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا.

ەل استاناسىنداعى فيزيكا-ماتەماتيكا باعىتىنداعى NIS-تە دومبىرا بويىنشا ەلەكتيۆتى كۋرستار 2016 جىلى ەنگىزىلدى. ايتجان توقتاعانوۆتىڭ جەتەكشىلىگىمەن قۇرىلعان مەكتەپىشىلىك «جىگەر» ءانسامبلى كوپتەگەن رەسپۋبليكالىق جانە حالىقارالىق مۋزىكالىق بايقاۋلاردىڭ جەڭىمپازى، «Sun of Italy» يتالياندىق فەستيۆال-بايقاۋىنىڭ باس جۇلدە يەگەرى، اقش-تىڭ اتاقتى گارۆارد پەن بوستون ۋنيۆەرسيتەتتەرى جانە ماسساچۋسەتس تەحنولوگيالىق ينستيتۋتى ساحنالارىندا ونەر كورسەتتى.

دومبىرا – ءاربىر قازاق ءۇشىن قاسيەتتى اسپاپ، ال ءبىزدىڭ ساباعىمىزدى گيننەسس رەكوردتار كىتابىنا ەنگىزۋ – بۇل دومبىرانى بۇكىل الەمگە پاش ەتۋ، – دەپ اتاپ ءوتتى ايتجان توقتاعان.

Guinness World Records-قا (GWR) ءوتىنىم 2021 جىلدىڭ جەلتوقسان ايىندا بەرىلدى. گيننەسس رەكوردتار كىتابىنىڭ تالاپتارى بويىنشا اۋقىمدى ساباقتى 25-تەن استام ستيۋارد پەن 2 كۋاگەر قاداعالادى. ءاربىر 50 قاتىسۋشىنى ءبىر تاۋەلسىز ستيۋارد باقىلاپ، بەينەجازبا ايماعىنان شىققان نەمەسە قاجەتتى ارەكەتتى ورىنداماعان توپتاعى كەز-كەلگەن قاتىسۋشىنى ديسكۆاليفيكاتسيالاۋ جۇمىسىنا جاۋاپتى بولدى. كۋاگەرلەر GWR-ءدىڭ سەنىمدى وكىلى رەتىندە قىزمەت اتقارىپ، رەكوردتىڭ ورناۋى مەن كىتاپتىڭ بارلىق كريتەريلەرىنىڭ تولىق ساقتالۋىن قامتاماسىز ەتتى.

Guinness World Records ەرەجەلەرىنە سايكەس اۋقىمدى ساباق باستالار الدىندا بارلىق قاتىسۋشى ەكى تىركەۋ پۋنكتىنەن ءوتتى: ءبىرىنشىسى – جەكە بەيدجدەرىن سكانەرلەپ، «كانديدات-ماركەر» باعدارلاماسى ارقىلى ايماققا كىردى، ەكىنشىسى – كەزەكشى قاتىسۋشىلاردىڭ مەحانيكالىق ەسەبىن جۇرگىزدى.

 مەن زياتكەرلىك مەكتەپكە تۇسكەننەن كەيىن دومبىرا تارتۋدى ۇيرەندىم. ال قاشىقتان ءبىلىم الىپ جۇرگەن كەزدە بەينەساباقتار ارقىلى مەڭگەرە باستادىم. بۇگىن ءبىز ءۇشىن ەرەكشە كۇن. ارينە، قوبالجۋ بولدى، الايدا گيننەسس كىتابىنا كۇي ورىنداعانىمىزعا قۋانىشتىمىز جانە بۇل رەكوردتى دومبىراعا ارنايمىز، –  دەپ  9-سىنىپ وقۋشىسى ەراسىل ايبەكۇلى ءوز اسەرىمەن ءبولىستى.

ءبىر مەكتەپتىڭ مىڭعا جۋىق وقۋشىسى ۇلتتىق مۋزىكالىق اسپاپتى جەتىك مەڭگەرىپ، بىرگە كۇي ورىنداۋى الەمدەگى تۇڭعىش وقيعا. قازاقستاندىق رەكورد اسا كورنەكتى جەتىستىكتەر مەن بىرەگەي قۇبىلىستار تۋرالى جاھاندىق انىقتامالىققا ەنگىزىلەدى دەپ جوسپارلانۋدا.

قازاق حالقىنىڭ باستى ۇلتتىق اسپابى – دومبىرا نازارباەۆ زياتكەرلىك مەكتەپتەرىنىڭ سيمۆولىنا اينالدى. بۇگىنگى تاڭدا ەلىمىزدەگى بارلىق NIS-تە دومبىرا ءپانىنىڭ ەلەكتيۆتى كۋرستارى ەنگىزىلىپ، ونىڭ اياسىندا قۇرمانعازى ساعىربايۇلى، تاتتىمبەت قازانعاپۇلى، نۇرعيسا تىلەنديەۆتىڭ اتاقتى كۇيلەرىنىڭ تاريحى مىندەتتى تۇردە وقىتىلادى، ال ەڭ تانىمال جوبالاردىڭ قاتارىندا «100 كۇيدىڭ تاريحى» جوباسى بار، بارلىق مەكتەپتە دومبىرا انسامبلدەرى مەن ستۋديالارى جۇمىس ىستەيدى، دومبىرا ساباقتارى ماتەماتيكا، فيزيكا، شەت ءتىلى ساباقتارىمەن ۇشتاستىرىلۋدا، جاس مۋزىكانتتار «ۇلى دالا مۇراگەرلەرى» ءداستۇرلى فلەشموبىندا جىل سايىن ەل ساحنالارىن باعىندىرىپ ءجۇر. دومبىرا مەن ۇلتتىق مۋزىكاعا دەگەن قىزىعۋشىلىقتى ارتتىرۋ بويىنشا جۇيەلى جۇمىس NIS-ءتىڭ حالىقتىق قۇندىلىقتار مەن داستۇرلەردى ساقتاۋ بويىنشا اۋقىمدى باعدارلاماسى اياسىندا ىسكە اسىرىلىپ كەلەدى.

بۇگىن بارلىق زياتكەرلىك مەكتەپتەردەگى وقۋ جىلى دومبىرا ساباعىمەن اياقتالدى.

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket