مولدوۆانىڭ ەكس-پرەزيدەنتى يگور دودون مەملەكەتكە وپاسىزدىق جاسادى دەگەن كۇدىكپەن ۇستالىپ، 72 ساعاتقا قاماۋعا الىندى. بۇل تۋرالى باس پروكۋراتۋرانىڭ ءباسپاسوز حاتشىسى مارياننا كەرپەك مالىمدەدى، دەپ حابارلايدى «ادىرنا» ءتىلشىسى.
قازىرگى تاڭدا تەرگەۋ ءتورت باپ بويىنشا جۇرگىزىلىپ جاتىر. اتاپ ايتساق، ەكس-باسشى جەمقورلىق، ساياسي پارتيا ءۇشىن قىلمىستىق ۇيىمنان قارجى الۋى، زاڭسىز بايۋ جانە مەملەكەتكە وپاسىزدىق قىلمىستىق ىستەرى بويىنشا كۇدىكتى دەپ تانىلدى.
«يگور دودوننىڭ ۇيىنە ءتىنتۋ جۇمىستارى جۇرگىزىلدى. تەرگەۋ امالدارى جالعاسىپ جاتىر»،– دەدى مولدوۆا باس پروكۋراتۋراسىنىڭ ءباسپاسوز قىزمەتى.
ايتا كەتەيىك، بۇرىنعى باسشىعا قاتىستى قىلمىستىق ءىس 18 مامىردا قوزعالدى.
«ادىرنا» ۇلتتىق پورتالى
