قر بعم مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا سوڭعى قوڭىراۋ مەرەكەلىك شاراسىندا مۇعالىمدەرگە گۇل سىيلاۋعا بولاتىنىن مالىمدەدى، دەپ حابارلايدى «ادىرنا» ءتىلشىسى.
«سوڭعى قوڭىراۋ – بۇل مۇعالىمدەر مەن وقۋشىلار وقۋ جىلىنىڭ قورىتىندىسىن شىعارىپ، ءبىلىم الۋشىلاردىڭ جەتىستىكتەرىن اتاپ وتەتىن كوڭىلدى ءارى ماڭىزدى وقيعا. جىل سايىن 1 قىركۇيەك نەمەسە 25 مامىر قارساڭىندا قوعامدا «مۇعالىمگە گۇل سىيلاۋعا بولا ما جانە بۇل زاڭ بۇزۋشىلىق بولىپ سانالماي ما؟» دەگەن سۇراق تۋىندايدى. ءبىزدىڭ ۇستانىمىمىز - ءيا، بولادى. بۇل جاقسى ءداستۇر عوي»، - دەدى ول.رەسپۋبليكانىڭ بارلىق جالپى ءبىلىم بەرەتىن مەكتەبىندە سوڭعى قوڭىراۋ مەرەكەسىن ءبىر مەزگىلدە وتكىزۋ جوسپارلانىپ وتىر. وعان مەكتەپتىڭ پەداگوگيكالىق ۇجىمى، تۇلەكتەر جانە ولاردىڭ اتا-انالارى، پەداگوگيكالىق ەڭبەك ارداگەرلەرى، قامقورشىلىق كەڭەس مۇشەلەرى، دەمەۋشى ۇيىمداردىڭ، ءبىلىم جانە عىلىم مينيسترلىگى مەن وبلىستاردىڭ، نۇر-سۇلتان، الماتى، شىمكەنت قالالارى ءبىلىم باسقارمالارىنىڭ وكىلدەرى، ءبىلىم بولىمدەرى، مۇددەلى مەملەكەتتىك ورگاندار جانە ت.ب. قاتىسا الادى. مەكتەپ ءبىتىرۋ كەشىن ءبىلىم بەرۋ ۇيىمى ءوزى ۇيىمداستىرىپ، وتكىزۋى كەرەك. رۇقسات ەتىلمەيدى:
– انيماتورلاردى، مەرەكەلىك اگەنتتىكتەردى، ارتىستەردى، مەرەكەلىك ءىس-شارالاردى وتكىزۋ ءۇشىن اقىلى جەكە ستۋديالاردى تارتۋعا; - مەرەكەلىك داستارحاندار جايۋعا; – جالعا بەرىلەتىن اۆتوكولىكتەردى تارتا وتىرىپ، قالا (اۋدان) بويىنشا ەكسكۋرسيالار وتكىزۋگە; – مەكتەپ اكىمشىلىگى مەن مۇعالىمدەرگە سىيلىقتار الۋ ءۇشىن قاراجات جيناۋعا; - ويىن-ساۋىق مەكەمەلەرىندە ءبىتىرۋ كەشتەرىن ۇيىمداستىرۋعا.قازاقستاننىڭ بارلىق مەكتەبىندە «سوڭعى قوڭىراۋ» مەرەكەسى 2022 جىلعى 25 مامىردا وتەتىنىن ەسكە سالا كەتەيىك. ال اتتەستاتتى سالتاناتتى تۇردە تاپسىرۋ ءراسىمى 2022 جىلعى 16-17 ماۋسىمدا وتەدى.
