QR BǴM Mektepke deıingi jáne orta bilim komıtetiniń tóraıymy Gúlmıra Kárimova sońǵy qońyraý merekelik sharasynda muǵalimderge gúl syılaýǵa bolatynyn málimdedi, dep habarlaıdy «Adyrna» tilshisi.
«Sońǵy qońyraý – bul muǵalimder men oqýshylar oqý jylynyń qorytyndysyn shyǵaryp, bilim alýshylardyń jetistikterin atap ótetin kóńildi ári mańyzdy oqıǵa. Jyl saıyn 1 qyrkúıek nemese 25 mamyr qarsańynda qoǵamda «Muǵalimge gúl syılaýǵa bola ma jáne bul zań buzýshylyq bolyp sanalmaı ma?» degen suraq týyndaıdy. Bizdiń ustanymymyz - ıá, bolady. Bul jaqsy dástúr ǵoı», - dedi ol.
Respýblıkanyń barlyq jalpy bilim beretin mektebinde sońǵy qońyraý merekesin bir mezgilde ótkizý josparlanyp otyr. Oǵan mekteptiń pedagogıkalyq ujymy, túlekter jáne olardyń ata-analary, pedagogıkalyq eńbek ardagerleri, qamqorshylyq keńes músheleri, demeýshi uıymdardyń, Bilim jáne ǵylym mınıstrligi men oblystardyń, Nur-Sultan, Almaty, Shymkent qalalary bilim basqarmalarynyń ókilderi, bilim bólimderi, múddeli memlekettik organdar jáne t.b. qatysa alady.
Mektep bitirý keshin bilim berý uıymy ózi uıymdastyryp, ótkizýi kerek. Ruqsat etilmeıdi:
– anımatorlardy, merekelik agenttikterdi, ártisterdi, merekelik is-sharalardy ótkizý úshin aqyly jeke stýdııalardy tartýǵa;
- merekelik dastarhandar jaıýǵa;
– jalǵa beriletin avtokólikterdi tarta otyryp, qala (aýdan) boıynsha ekskýrsııalar ótkizýge;
– mektep ákimshiligi men muǵalimderge syılyqtar alý úshin qarajat jınaýǵa;
- oıyn-saýyq mekemelerinde bitirý keshterin uıymdastyrýǵa.
Qazaqstannyń barlyq mektebinde «Sońǵy qońyraý» merekesi 2022 jylǵy 25 mamyrda ótetinin eske sala keteıik. Al attestatty saltanatty túrde tapsyrý rásimi 2022 jylǵy 16-17 maýsymda ótedi.
