جامبىل وبلىسىندا ءبىر مەكتەپتىڭ ەكى بالاسىن جوعارى سىنىپ وقۋشىسى جىنىستىق قاتىناسقا ماجبۇرلەگەن. جابىرلەنۋشى اتا-انالار ەرسى جاعدايدى ايتپاسقا بولمادى دەيدى. ويتكەنى جەرگىلىكتى بيلىك شارا قولدانۋدىڭ ورنىنا كوز جۇما قاراۋعا كوندىرىپ الەك. ەندى اتا-انالار ءزابىر كوردى دەگەن بالالارىن مەكتەپكە جىبەرۋگە ءۇزىلدى-كەسىلدى قارسى بولىپ وتىر، دەپ حابارلايدى 31-ارنانىڭ "ينفورمبيۋرو" باعدارلاماسى.
“ۇلكەن دارەت جىبەرەتىن جاعىنان ءوزىم زاقىم كەلدى دەپ ويلاپ تۇرمىن. ويتكەنى بالام وزگەرىپ كەتكەن. قازىر بارلىق ءسوزىن ايتقاننان كەيىن ۋجە ۇيالمايدى. بويىنا جىبەرسە، مەن جىبەردىم دەپ ايتاتىن بولدى”، – دەيدى جابىرلەنۋشىنىڭ اكەسى.
اۋەل باستا سەكەمىنە سەنبەگەن اكەسى ءسوز سۋىرتپاقتاپ كورگەن. سوزىنشە، كەيىن بالاسى بولعان جايدى، وقيعا ورنىن تاپپىشتەپ ايتىپ بەرگەن. اۋىل ىشىندەگى ەسكى قورا مەن ىرگە تاستىڭ ىشىندە بۇل جاعداي بىلتىردان بەرى تۇراقتى جالعاسىپ كەلگەن دەيدى. ۇلىنىڭ سوزىنەن ءجابىر كورگەن جالعىز ءوزىنىڭ بالاسى ەمەس ەكەنىن ۇققانىن ايتادى. وقۋشى وزىنەن ەكى جاس ۇلكەن تاعى ءبىر اۋىلداسىن ايتىپ قالىپتى. ازاماتتىڭ ايتۋىنشا، ءۇشىنشى سىنىپتا وقيتىن ول وقۋشى دا بۇل جاعدايدى سول قالپىندا راستاپتى.
“بىزدە كافە بار عوي بۇزىلعان. سول جاققا اپارىپ تيىسەدى ەكەن. جىنىس مۇشەسىن كورسەتەدى ەكەن. ءبىز نەگىزىندە ەشكىمگە جالا جاۋىپ وتىرعان جوقپىز. نە مەكتەپكە، نە اتا-اناسىنا، نە بالاعا. تەك بىلەيىك اق-قاراسىن. بالانىڭ قۇقىعىن قورعاسىن”، – دەدى جابىرلەنۋشىنىڭ اناسى.
اشۋلى اتا-انالار جەرگىلىكتى بيلىك بولعان جايتتى باسقا ارناعا بۇرىپ الەك ەكەنىن ايتادى. ىڭ-شىڭسىز، ۋ-شۋسىز شەشىمىنە دە كونگەن. تەك ءزابىر كورسەتكەن وقۋشىمەن ءبىر مەكتەپتە وقۋعا تۇبەگەيلى قارسىلىقتارىن ءبىلدىرىپتى. بىراق بۇل تالابىن ەلەمەي، جايسىز جايدى جابا سالۋعا جانتالاسىپ جاتىر دەيدى.
“تالابىم: اۋىلدا بالا كوز الدىمدا جۇرمەسە ەكەن دەيمىن. ول كوشىپ كەتۋ ماسەلەسى. ويتكەنى بالالار ءبىر-ءبىرىن كورمەسە ەكەن دەيمىن”، – دەپ قوستى جابىرلەنۋشىنىڭ اكەسى.
“مەديتسينالىق ساراپتامالار سول كەزدە جاسالىندى. قازىرگى تاڭدا زەردەلەۋ جۇمىستارى جۇرگىزىلىپ جاتىر. سوڭىنا دەيىن ءالى زەردەلەنەدى. قازىرگى تاڭدا ناقتى دالەل، اقپارات جوق”، – دەپ مالىمدەدى "اقشولاق" ورتا مەكتەبىنىڭ ديرەكتورى نۇرالى سەيداحمەت.
قازىر وسى ىسكە قاتىستى ىشكى ىستەر بولىمىنە شاعىم تۇسكەن. بىراق ساراپتاما راستالماي ءىس قوزعاۋعا ءالى ەرتە دەيدى.
“بايزاق اۋدانىنىڭ پوليتسيا بولىمىمەن تەكسەرۋ جۇمىستارى باستالدى. كامەلەتكە تولماعان 6 جانە 8 جاستاعى بالالار اۋداندىق ورتالىق اۋرۋحاناعا جەتكىزىلىپ، ولاردى تەكسەرۋ بارىسىندا جاراقات بەلگىلەرى انىقتالماعان. الايدا ولاردىڭ اتا-انالارىنان ارىز الىنىپ، تىركەلدى. قازىرگى ۋاقىتتا 10 جاسار 5-سىنىپ وقۋشىسىنا قاتىستى تەكسەرۋ امالدارى جۇرگىزىلۋدە، قوسىمشا اۋدان اكىمدىگى جانىنداعى كامەلەتكە تولماعاندار كوميسسياسىندا قارالاتىن بولادى”، – دەدى جامبىل وبلىسى پوليتسيا دەپارتامەنتىنىڭ وكىلى قۇندىز بوگەنباەۆا.
ەرىنبەگەننىڭ ءبارى ەسىك قاعىپ اۋىز اشپاۋعا كوندىرۋدە دەگەن ەكى جەتكىنشەكتىڭ اتا-اناسى ءىستىڭ اق-قاراسى اشىلاتىنىنا كۇدىگى بار. سوندىقتان ساراپتامانى الماتىعا بارىپ انىقتاۋعا قۇلىقتى.
