رەسەي سىرتقى ىستەر مينيسترلىگى ەلگە كىرۋىنە تىيىم سالىنعان اقش ازاماتتارىنىڭ ءتىزىمىن جاريالادى. وندا 963 ادامنىڭ اتى-ءجونى جازىلعان، دەپ حابارلايدى "ادىرنا" ۇلتتىق پورتالى "azattyq.org" سايتىنا سىلتەمە جاساپ.
تىزىمدە اقش پرەزيدەنتى دجو بايدەن، ۆيتسە-پرەزيدەنت كامالا حارريس جانە وزگە دە قوعام قايراتكەرلەرى بار. تىزىمگە تانىمال اكتەر مورگان فريمان دا ەنگەن. رەسەي بيلىگىنىڭ حابارلاماسىندا ونىڭ 2017 جىلى قىركۇيەكتە ۆيدەومالىمدەمە جاساپ، "رەسەيدى اقش-قا قارسى استىرتىن ارەكەت ەتتى" دەپ ايىپتاعانى جازىلعان.
سانكتسيا تىزىمىندە اقش سەناتىنىڭ ونداعان وكىلى جانە وكىلدەر پالاتاسىنىڭ 400-دەن استام مۇشەسى دە بار. ولار بۇعان دەيىن رەسەيگە سانكتسيا سالۋدى قولداعان.
تىزىمدە اقش مەملەكەتتىك حاتشىسى ەنتوني بلينكەن، بايدەن اكىمشىلىگىنىڭ بىرنەشە وكىلى، ونىڭ ىشىندە، قورعانىس ءمينيسترى للويد وستين، ورتالىق بارلاۋ باسقارماسىنىڭ باسشىسى ۋيليام بەرنس تە بار.
رەسەيدە "ەكسترەميستىك كورپوراتسيا" دەپ تانىلعان "Meta" جەتەكشىسى مارك تسۋكەربەرگكە دە تىيىم سالىنعان.
"ادىرنا" ۇلتتىق پورتالى.
