قاداعالاۋشى ورگانعا تۇرعىندار قانت  تاپپاي جۇرگەندەرىن ايتىپ شاعىمدانىپ جاتقان كورىنەدى. جەمقورلىققا قارسى ءىس- قيمىل دەپارتامەنتى ساۋدا نۇكتەلەرى مەن جەرگىلىكتى دۇكەندەردى تەكسەرۋگە كىرىسكەن.

"باعالارعا مونيتورينگ جاسايمىز، قوعامدىق تاماقتانۋ ورىندارى دۇكەندەر قانتتى نەگىزسىز قىمباتتاتىپ جىبەردى. باعاسى كورسەتىلگەن، بىراق قانت جوق سورەلەر تۇر. ءتىپتى 900 دەن 1300 تەڭگەگە دەيىن كوتەرىلگەن", — دەيدى قر سىبايلاس جەمقورلىققا قارسى ءىس-قيمىل اگەنتتىگىنىڭ قاراعاندى وبلىسى بويىنشا دەپارتامەنتى، "سارىارقا - ادالدىق الاڭى" جوبالىق كەڭسەسىنىڭ جەتەكشىسى ماليكا كۇسەنباەۆا.

"وبلىسقا اي باسىنان باستاپ 400 توننا قانت ءونىمى كەلگەن بولاتىن جانە كوممەرتسيالىق قويمالاردا 334 توننادان استام قانت ءونىمى بار. جانە دە سپك ستابيليزاتسيالىق قورىندا 465 توننادان استام قانت ءونىمى بار. جانە دە تاۋارلىق ينتەرۆەنتسيا جۇرگىزىلۋدە", — دەيدى قاراعاندى وبلىستىق كاسىپكەرلىك باسقارماسى ءبولىم باسشىسىنىڭ مىندەتىن اتقارۋشى جۇلدىز قۇسايىن.

قاراعاندى ۆوكزالىنىڭ ماڭىنداعى جۇرت ەڭ كوپ كەلەتىن الەۋمەتتىك پاۆيلوننىڭ ساتۋشىلارى كۇنىنە سەگىز قاپ قانت ساتاتىندارىن ايتادى. سۋپەرماركەتتەر جەلىسىنىڭ كوبىندە شەكەر بىتكەن. ال كاسىپكەرلىك باسقارماسىنىڭ مالىمەتىنشە، ءونىم وڭىردە جەتكىلىكتى. "جوقشىلىقتى كاسىپكەرلەر قولدان جاساپ وتىر", - دەيدى.