قازىرگى ۋاقىتتا قازاقستاندا نەگىزگى ازىق-تۇلىك تاۋارلارىنىڭ قورى جاسالدى، - دەپ حابارلايدى «ادىرنا» ۇلتتىق پورتالى قر ساۋدا جانە ينتەگراتسيا مينيسترلىگىنە سىلتەمە جاساپ.
"وڭىرلەر مەن ساۋدا جەلىلەرى وداعىنىڭ اقپاراتى بويىنشا، تۇراقتاندىرۋ قورلارى مەن ساۋدا وبەكتىلەرىندە قانت قورلارى جەتكىلىكتى", - دەلىنگەن حابارلامادا.
ەلىمىزدە جەتكىزۋشىلەردىڭ گەوگرافياسىن كەڭەيتۋ ماقساتىندا دايىن قانت ءوندىرۋ ءۇشىن باسقا ەلدەردەن شيكى قانت ساتىپ الۋ جۇمىسى ءجۇرىپ جاتقانى دا ايتىلدى.
"قازاقستاندا بيىل تامىز ايىنىڭ سوڭىنا دەيىن كەدەندىك باجداردى تولەمەي 250 مىڭ توننا قانت اكەلۋ مۇمكىندىگى بار", - دەپ ناقتىلادى مينيسترلىك.
قانت باعاسىن تۇراقتى دەڭگەيدە ۇستاپ تۇرۋ ءۇشىن ورتالىق جانە جەرگىلىكتى اتقارۋشى ورگاندار ساۋدا وبەكتىلەرىنىڭ "اينالىم سحەماسىن" پايدالانۋدى كوزدەپ وتىر.
«ادىرنا» ۇلتتىق پورتالى
