ەلوردادا تۇتاس ءبىر كوشەنىڭ تۇرعىندارى ونكولوگيالىق سىرقاتقا شالدىققان. دەرت مەڭدەگەن ءبىراز ازامات و دۇنيەلىك بولىپ كەتكەن، دەپ حابارلايدى "ادىرنا" ۇلتتىق پورتالى “كتك” ارناسىنا سىلتەمە جاساپ.
ەلورداداعى كۇلتەگىن، قازىرگى بيشىقايىڭ كوشەسىنىڭ تۇرعىندارى 24 جىلدان بەرى جوعارى كەرنەۋلى باعانالارمەن الىسىپ كەلەدى. ايتۋلارىنشا، سونىڭ سالدارىنان ءار ۇيدە ادامدار اۋىر دەرتكە شالدىعىپ جاتىر.
بۇل كوشەنىڭ ءار ۇيىندە ونكولوگيالىق دەرتپەن اۋىراتىن ءبىر جان بار. سوناۋ 1998 جىلى بۇل باعانالاردى تۇرعىنداردىڭ قاق توبەسىنەن جۇرگىزگەندە شەنەۋنىكتەر "ۋاقىتشا، كەيىن سىزدەردى باسقا جەرگە كوشىرەمىز" دەپ ۋادە بەرگەن. ازاماتتاردىڭ سول ۋادەنى كۇتىپ جۇرگەنىنە 24 جىل بولعان.
گۇلجان باينۇكەەۆا باعانالاردى ورناتاردان ءبىر جىل بۇرىن وسى ۇيىنە كوشىپ كەلىپتى. “تۇگەل كوشە بولىپ كەرنەۋدىڭ زاردابىن تارتىپ وتىرمىز”، - دەيدى ول. ونكولوگيالىق اۋرۋدان جەڭىلىپ باقيعا اتتانىپ جاتقاندارى دا قانشاما. ءوزى دە ءبىر ۇلىن جەر قوينىنا بەرگەن.
“ادامنىڭ ومىرىنە زيان. بىزدە كوشەمىزدە اۋىرمايتىن ادام جوق. ءجۇز ادام بولسا، سونىڭ جەتپىس بەس پروتسەنتى اۋىرادى. وسى ءبىزدىڭ كوشەمىزدە تۇراتىن جەتپىس بەس پروتسەنتى اۋىرادى. مەنىڭ ءوزىم ونكولوگيامەن اۋىرامىن. قىزىم دا اۋىرادى، كۇيەۋىمنىڭ قان قىسىمى جوعارى. ءبىر ۇيدە ءتورت ادام تۇرساق سونىڭ ۇشەۋمىز ۋچەتتا تۇرامىز”، – دەيدى نۇر-سۇلتان قالاسىنىڭ تۇرعىنى گۇلجان باينۇكەەۆا.
سىرقاتقا قارسى كۇرەسەر يممۋنيتەتتىڭ السىزدىگىنەن اۋرۋ بىتكەننىڭ بارلىعى وسى كوشەنىڭ تۇرعىندارىنا جابىساتىنداي. قىسقا تولقىندى پەشتىڭ ىشىندە ءومىر ءسۇرىپ جاتقاندايمىز دەپ اشىنعان ازاماتتار بۇگىن ەنەرگەتيكا ءمينيسترى بولات اقشولاقوۆتىڭ ەلوردالىقتارمەن كەزدەسۋىنە دە كەلدى. ولار ءوز كوشەلەرىندە سانيتارلىق نورما تالاپتارى بۇزىلعانىن راستاعان دەنساۋلىق ساقتاۋ مينيسترلىگىنىڭ قاۋلىسى بولسا دا، نەگە ءالى كۇنگە سەڭ قوزعالماي جاتقانىن تۇسىنبەي دال.
“مەنىڭ ون جاسار بالامنىڭ بەتىندە ىسىك پايدا بولدى. ءبىز ونكولوگ دارىگەردىڭ ەسەبىندە تۇرمىز. وعان وتا جاساۋ كەرەك. ءبىزدىڭ كوشەدە ەرەسەكتەردى بىلاي قويعاندا ءتىپتى ساۋ بالا قالماي بارا جاتىر. بۇل نە سۇمدىق”، – دەيدى نۇر-سۇلتان قالاسىنىڭ تۇرعىنى گۇلدەن ادىلبەكقىزى.
ازاماتتاردىڭ قاقپاعان ەسىگى قالماعان. وسى ماسەلەگە جاۋاپتى اقمولا ەلەكترجەلىلىك ۇلەستىرۋ كومپانياسىنىڭ وكىلدەرىنە دە ارىزدانعان. بىراق ولار ەشقانداي ەرەجەنىڭ بۇزىلماعانىن ايتادى.
“سانيتارلىق نورماسى مەن ەرەجەلەرى ساقتالعان. ءتىپتى بولماشى 20 مەترىنە دەيىن. ماسەلەنىڭ ەڭ مادەنيەتتى شەشىمى- سوتقا جۇگىنۋ. مۇنداي بوس اڭگىمەدەن ەش ناتيجە شىقپايدى. مەنىڭ باسقا ايتارىم جوق”، – دەيدى "اقمولا ەلەكترجەلىلىك ۇلەستىرۋ كومپانياسى" اق باس ينجەنەرى رۋسلان وتەباەۆ.
"نەگىزى بۇنداي كەم-كەتىكتەردى تۇزەگەن ەدىك، سىزدەر نازاردان قالاي تىس قالعانسىزدار", - دەدى ەنەرگەتيكا ءمينيسترى.
“بۇل بۇرىن وتە ۇلكەن ماسەلە ەدى. وسىنداي تىم تومەن، اشىق ورنالاسقان ەلەكتر جەلىلەرى كوپ بولدى. كەيىن ولاردىڭ بارلىعى جەر استى كابەلىنە الماستىرىلدى. سىزدەردىكى سەكىلدى تۇيىق كوشەلەر نازاردان تىس قالىپ قويعان بولۋى كەرەك. كورەيىك، جاعدايدى باعامدايىق، بىزگە ۋاقىت بەرىڭىزدەر”، – دەيدى ەنەرگەتيكا ءمينيسترى اقشولاقوۆ.
ەنەرگەتيكا ءمينيسترى باستاپقىدا “ورىنباسارلارىمدى جىبەرەمىن، ولار جاعدايمەن تانىسادى” دەگەن. بىراق، ارتىنشا، توقتىڭ زاردابىن تارتقان تۇرعىنداردىڭ جاي-كۇيىن ءوز كوزىمەن كورۋگە ۋادە بەردى.
"ادىرنا" ۇلتتىق پورتالى.
