Elordada tutas bir kósheniń turǵyndary onkologııalyq syrqatqa shaldyqqan. Dert meńdegen biraz azamat o dúnıelik bolyp ketken, dep habarlaıdy "Adyrna" ulttyq portaly “KTK” arnasyna silteme jasap.
Elordadaǵy Kúltegin, qazirgi Bıshiqaıyń kóshesiniń turǵyndary 24 jyldan beri joǵary kerneýli baǵanalarmen alysyp keledi. Aıtýlarynsha, sonyń saldarynan ár úıde adamdar aýyr dertke shaldyǵyp jatyr.
Bul kósheniń ár úıinde onkologııalyq dertpen aýyratyn bir jan bar. Sonaý 1998 jyly bul baǵanalardy turǵyndardyń qaq tóbesinen júrgizgende sheneýnikter "ýaqytsha, keıin sizderdi basqa jerge kóshiremiz" dep ýáde bergen. Azamattardyń sol ýádeni kútip júrgenine 24 jyl bolǵan.
Gúljan Baınúkeeva baǵanalardy ornatardan bir jyl buryn osy úıine kóship kelipti. “Túgel kóshe bolyp kerneýdiń zardabyn tartyp otyrmyz”, - deıdi ol. Onkologııalyq aýrýdan jeńilip baqıǵa attanyp jatqandary da qanshama. Ózi de bir ulyn jer qoınyna bergen.
“Adamnyń ómirine zııan. Bizde kóshemizde aýyrmaıtyn adam joq. Júz adam bolsa, sonyń jetpis bes proenti aýyrady. Osy bizdiń kóshemizde turatyn jetpis bes proenti aýyrady. Meniń ózim onkologııamen aýyramyn. Qyzym da aýyrady, kúıeýimniń qan qysymy joǵary. Bir úıde tórt adam tursaq sonyń úsheýmiz ýchetta turamyz”, – deıdi Nur-Sultan qalasynyń turǵyny Gúljan Baınúkeeva.
Syrqatqa qarsy kúreser ımmýnıtettiń álsizdiginen aýrý bitkenniń barlyǵy osy kósheniń turǵyndaryna jabysatyndaı. Qysqa tolqyndy peshtiń ishinde ómir súrip jatqandaımyz dep ashynǵan azamattar búgin energetıka mınıstri Bolat Aqsholaqovtyń elordalyqtarmen kezdesýine de keldi. Olar óz kóshelerinde sanıtarlyq norma talaptary buzylǵanyn rastaǵan densaýlyq saqtaý mınıstrliginiń qaýlysy bolsa da, nege áli kúnge seń qozǵalmaı jatqanyn túsinbeı dal.
“Meniń on jasar balamnyń betinde isik paıda boldy. Biz onkolog dárigerdiń esebinde turmyz. Oǵan ota jasaý kerek. Bizdiń kóshede eresekterdi bylaı qoıǵanda tipti saý bala qalmaı bara jatyr. Bul ne sumdyq”, – deıdi Nur-Sultan qalasynyń turǵyny Gúlden Ádilbekqyzy.
Azamattardyń qaqpaǵan esigi qalmaǵan. Osy máselege jaýapty Aqmola elektrjelilik úlestirý kompanııasynyń ókilderine de aryzdanǵan. Biraq olar eshqandaı erejeniń buzylmaǵanyn aıtady.
“Sanıtarlyq normasy men erejeleri saqtalǵan. Tipti bolmashy 20 metrine deıin. Máseleniń eń mádenıetti sheshimi- sotqa júginý. Mundaı bos áńgimeden esh nátıje shyqpaıdy. Meniń basqa aıtarym joq”, – deıdi "Aqmola elektrjelilik úlestirý kompanııasy" AQ bas ınjeneri Rýslan Ótebaev.
"Negizi bundaı kem-ketikterdi túzegen edik, sizder nazardan qalaı tys qalǵansyzdar", - dedi energetıka mınıstri.
“Bul buryn óte úlken másele edi. Osyndaı tym tómen, ashyq ornalasqan elektr jelileri kóp boldy. Keıin olardyń barlyǵy jer asty kabeline almastyryldy. Sizderdiki sekildi tuıyq kósheler nazardan tys qalyp qoıǵan bolýy kerek. Kóreıik, jaǵdaıdy baǵamdaıyq, bizge ýaqyt berińizder”, – deıdi energetıka mınıstri Aqsholaqov.
Energetıka mınıstri bastapqyda “orynbasarlarymdy jiberemin, olar jaǵdaımen tanysady” degen. Biraq, artynsha, toqtyń zardabyn tartqan turǵyndardyń jaı-kúıin óz kózimen kórýge ýáde berdi.
"Adyrna" ulttyq portaly.
