قازاقستاننىڭ سىرتقى ىستەر مينيسترلىگى قىتايدىڭ سىرتقى ساياسي ۆەدومستۆوسىمەن وتكىزگەن كونسۋلدىق ماسەلەلەر تۋرالى كونسۋلتاتسيالارىندا اسپان استى ەلىندە قوس ازاماتتىق ءۇشىن ۇستالعان ەتنيكالىق قازاقتاردى بوساتۋدى سۇرادى، - دەپ حابارلايدى Tengrinews.kz ءتىلشىسى قر ءسىم ءباسپاسوز قىزمەتىنە سىلتەمە جاساپ. قازاقستان-قىتاي كونسۋلتاتسيالارىنىڭ كونسۋلدىق ماسەلەلەر بويىنشا كەزەكتى وتىرىسى وتكەن اپتادا بەيجىڭدە وتكەنى ايتىلادى. قازاقستان دەلەگاتسياسىن سىرتقى ىستەر مينيسترلىگى كونسۋلدىق قىزمەت دەپارتامەنتىنىڭ ديرەكتورى ارداق ماديەۆ، ال قىتاي دەلەگاتسياسىن سىرتقى ىستەر مينيسترلىگى كونسۋلدىق دەپارتامەنتىنىڭ ديرەكتورى گو شاوچۋن باسقارعان.
© قر ءسىم ءباسپاسوز قىزمەتى تاراپتار كونسۋلدىق سالاداعى ەكىجاقتى ىنتىماقتاستىقتىڭ، ەكى ەلدىڭ ازاماتتارىنىڭ قۇقىقتارى مەن مۇددەلەرىن قورعاۋدىڭ، سونداي-اق قازاقستان مەن قىتاي تۇرعىندارىنىڭ ءوزارا ساپارلارىنىڭ وزەكتى ماسەلەلەرى بويىنشا تولىققاندى كەلىسسوزدەر جۇرگىزدى. قازاقستاندىق تاراپ قىتايدان قازاقستانعا قونىس اۋدارعان جانە قازاقستان رەسپۋبليكاسىنىڭ ازاماتتىعىن العان ەتنيكالىق قازاقتاردىڭ جاعدايىنا قاتىستى ماسەلەنى قوزعادى. قىتايدا قوس ازاماتتىق ءۇشىن ۇستالعان ەتنيكالىق قازاقتاردىڭ ىستەرىن وبەكتيۆتى جانە ءادىل قاراۋ مەن ولاردى بوساتۋ تۋرالى تاباندى تىلەك ايتىلدى. قىتايدىڭ شىڭجاڭ-ۇيعىر اۆتونوميالىق ايماعىنداعى ەتنيكالىق قازاقتاردىڭ ماسەلەلەرىن شەشۋدىڭ ورتاق امالىن ويلاستىرۋعا ۋاعدالاستى. سونىمەن قاتار، كونسۋلتاتسيالار بارىسىندا ەلدەر اراسىنداعى ۆيزالىق رەجيمدى جەڭىلدەتۋ ماسەلەلەرى تالقىلاندى. تاراپتار ەكى ەلدىڭ حالىقارالىق اۋەجايلارىندا قازاقستان جانە قىتاي ازاماتتارىنىڭ كەلۋ/كەتۋ جانە ترانزيتپەن ءوتۋ ءتارتىبى تۋرالى اقپارات الماستى. ۆيزالىق ساياسات سالاسىندا تۋىندايتىن ماسەلەلەردىڭ تەحنيكالىق سيپاتىن ەسكەرە وتىرىپ، تاراپتار ەكى ەل ازاماتتارىنىڭ ءوزارا ساپارلارى ءۇشىن قولايلى جاعداي جاساۋعا دايىن ەكەندىگىن ءبىلدىردى، سونداي-اق تۇراقتى كونسۋلتاتسيالاردى ودان ءارى جالعاستىرۋعا كەلىستى.
kaz.tengrinews.kz
