استانا. قازاقپارات - ەلورداداعى «داۋلەت» سپورت كەشەنىندە مەملەكەت باسشىسى نۇرسۇلتان نازارباەۆ قولداۋ كورسەتكەن «Challenge درۋگوي تى!» سپورتتىق شاراسى اياسىندا قازاقستاننىڭ 4 قالاسىمەن اۋقىمدى «سپورتتىق تەلەكوپىر» وتكىزىلدى. قر مادەنيەت جانە سپورت ءمينيسترى ارىستانبەك مۇحامەديۇلى باستاعان مىڭداعان ەلوردالىق تۇرعىندار يىق تىرەسە جاتتىعۋ جاسادى، دەپ حابارلايدى قازاقپارات ءتىلشىسى. «مەملەكەت باسشىسى ءبىز ءۇشىن ۇلگى. نۇرسۇلتان ءابىشۇلى اتالعان اكتسيا اياسىندا بارلىق قازاقستاندىقتاردى سپورتپەن شۇعىلدانۋعا شاقىردى. ەلباسى ءوزىنىڭ جولداۋى اياسىندا ەڭ ماڭىزدى تاپسىرمانى - 2020 جىلعا دەيىن حالىقتىڭ 30 پايىزى دەنە شىنىقتىرۋ جانە سپورتپەن اينالىسۋى كەرەكتىگىن اتاپ وتكەن بولاتىن. وتكەن جىلدىڭ قورىتىندىسى بويىنشا دەەن شىنىقتىرۋمەن اينالىساتىن ادامداردىڭ سانى 5 ميلليوننان استى. ءبىز وسىمەن توقتالىپ قالماۋىمىز كەرەك. مەن سىزدەردىڭ بارلىقتارىڭىزدى سپورتپەن اينالىسۋعا شاقىرامىن. دەنە شىنىقتىرۋ - ءسىزدىڭ ءومىرىڭىزدىڭ ءبىر بولشەگىنە
اينالۋى كەرەك»، - دەدى مينيستر ارىستانبەك مۇحامەديۇلى.
كوپ كەشىكپەي جۇزدەگەن ازاماتتىڭ بىرلەسە جاتتىعۋى باستالىپ كەتتى. ارىستانبەك مۇحامەديۇلى تەلەكوپىر ارقىلى 4 قالامەن - شىمكەنت، وسكەمەن، پەتروپاۆل، اقتاۋ شاھارلارىنداعى سپورت بەلسەندىلەرىمەن تىكەلەي ترانسلياتسياعا شىقتى. ترانسلياتسياعا 4 وبلىس قوسىلعانىمەن، ايماق-ايماقتاردا دەنە شىنىقتىرۋ باستاماسىنا جينالىپ جاتتىعۋ جاساعان 10 ءوڭىردىڭ حالقى دا قوسىلىپ وتىر. سپورت باسقارماسى باسشىلارىنىڭ جەتەكشىلىگىمەن چەللەندجگە قاتىسۋشىلار ديناميكالىق مۋزىكانىڭ سۇيەمەلدەۋىمەن كەشەندى جاتتىعۋلار جاسادى. شاراعا بەلگىلى سپورتشىلار، ارتىستەر، مادەنيەت قايراتكەرلەرى، وڭىرلەرگە بەلگىلى تۇلعالار قاتىستى. استاناداعى گيمناستيكاعا «سامۇرىق قازىنا» اق باسقارۋشى ديرەكتورى الىشەر پىرمەتوۆ، ءماجىلىس دەپۋتاتى ءارى لوندون وليمپياداسىنىڭ چەمپيونى سەرىك ساپيەۆ، بوكسشى ۆاسيلي لەۆيت، گيۋزال مانيۋروۆا، ءانشى جەڭىس سەيدوللاۇلى قاتىستى.
ەسكە سالا كەتسەك، جاقىندا مەملەكەت باسشىسى نۇرسۇلتان نازارباەۆ «Challenge درۋگوي تى!» اتتى رەسپۋبليكالىق سپورت شاراسىنا قولداۋ كورسەتىپ، وسى اكتسيانىڭ قاتىسۋشىلارىنا بەينەۇندەۋ جولداعان بولاتىن. بۇل باستامانىڭ ماقساتى - ەلىمىزدىڭ تۇرعىندارى اراسىندا دەنە شىنىقتىرۋ مەن سالاۋاتتى ءومىر سالتىن ناسيحاتتاۋ. اكتسيا اياسىندا وتاندىق تانىمال سپورتشىلاردىڭ، ەلىمىزدىڭ مادەنيەت جانە ماسس-مەديا وكىلدەرىنىڭ قاتىسۋىمەن اشىق جاتتىعۋلار وتكىزۋ جوسپارلانىپ وتىر. وسىلايشا، ولار قازاقستاندىقتاردى دەنە شىنىقتىرۋمەن جانە سپورتپەن شۇعىلدانۋعا ىنتالاندىراتىن بولادى.
«قۇرمەتتى وتانداستار! سپورتپەن شۇعىلدانۋ، جاتتىعۋ جاساۋ - سالاماتتى ءومىر سالتىن قالىپتاستىرۋدىڭ نەگىزگى كەپىلى بولىپ سانالادى. دەنساۋلىعى مىقتى ادام عانا باقىتتى ءومىر ءسۇرىپ، بيىك ماقساتقا قول جەتكىزە الادى. بۇكىل ادامزاتقا بەلگىلى قاعيدا - بايلىق تا ەمەس، مانساپ تا ەمەس. باقىتتىڭ 90 پروتسەنتى دەنساۋلىقتا جاتىر. ءاربىر ازامات «شىنىقساڭ، شىمىر بولاسىڭ» دەگەن قاعيدانى بەرىك ۇستانعانى ابزال. مەملەكەت دەنە تاربيەسىنە ەرەكشە كوڭىل ءبولىپ، سپورت سالاسىن دامىتۋعا جاعداي جاساپ كەلە جاتقانىن وزدەرىڭىز كورىپ وتىرسىزدار. بارلىق وبلىستاردا ستاديوندار جونگە كەلتىرىلدى. بارلىق وبلىستاردا تەننيستىك كوردتاردى سالىپ جاتىرمىز. قازىر قالالاردى ارالاپ كورسەڭىزدەر، ءاربىر اۋداندا، ءاربىر اۋلادا، ياعني بارلىق جەرلەردە كىشكەنتاي سپورت الاڭدارى جاسالىپ، سول جەردە ءبىزدىڭ جاستارىمىز دەنەسىن شىنىقتىرۋدا»، - دەگەن ەدى نۇرسۇلتان نازارباەۆ.
nationalmuseum.kz
Басқалармен бөлісе отырыңыз
