ش.ەسەنوۆ اتىنداعى ۋنيۆەرسيتەتتىڭ ۇيىمداستىرۋىمەن وتكەن رەسپۋبليكالىق «Yessenov Fest - 2022» ستۋدەنتتىك فەستيۆالى اياسىندا ونەر كورسەتكەن يفۋنانيا ماريزيتتا اناشوللي ديماش قۇدايبەرگەننىڭ «دايديداۋ» ءانىن شىرقادى، دەپ حابارلايدى "ادىرنا" ۇلتتىق پورتالى.
ماڭعىستاۋ وبلىستىق قوعامدىق كوممۋنيكاتسيا ورتالىعىنىڭ مالىمەتىنشە، ماريزيتتا اناشوللي «جاستار شىعارماشىلىعى» بايقاۋىندا ۆوكال جانرى بويىنشا قاتىسىپ، باعىن سىنادى. ونىڭ ايتۋىنشا، ءاندى «ستۋدەنتتىك ۆوكال» ۇيىرمەسىنىڭ جەتەكشىسى ماكينا گۇلنارا يمانبايقىزىمەن بىرلەسىپ تاڭداعان. قازىلار القاسى افريكالىق قىزدىڭ ونەرىنە ءتانتى بولىپ، العىس حات تاپسىردى.
ماريزيتتا اناشوللي ش.ەسەنوۆ اتىنداعى كاسپي ينجينيرينگ جانە تەحنولوگيالار ۋنيۆەرسيتەتىندە «كومپيۋتەر ينجينيرينگ جانە اقپارات تەحنولوگياسى» ماماندىعىنىڭ 1-كۋرسىندا گرانتتا وقيدى. ول قازاقستان تۋرالى عالامتوردان ءبىلىپ، قىزىعۋشىلىق تانىتقان.
-مەنىڭ وتباسىمدا ءبىر ۇل، ەكى قىز جانە اتا-انام بار. اكەم كاسىپكەر، انامنىڭ ءوز مەيرامحاناسى بار، اپكەم ستيليست، ال اعام كومپيۋتەر تەحنيگى. العاشقى كەزدە ولار قازاقستانعا كەتۋىمە قارسى بولدى. بىراق قازىر ويلارىن وزگەرتتى، قازاقستانعا قىدىرىپ كەلۋدى جوسپارلايدى. ءبىز بەينەبايلانىس ارقىلى ۇدايى سويلەسىپ تۇرامىز. ۋنيۆەرسيتەتتە وتكەن فەستيۆالدا ونەر كورسەتتىم جانە ول ماعان قاتتى ۇنادى-دەيدى نيگەريالىق بويجەتكەن.
ماريزيتتا ونەر كورسەتكەن «جاستار شىعارماشىلىعى» بايقاۋى «اسپاپتا ويناۋ»، «ءداستۇرلى ءان»، «ەسترادالىق ۆوكال»، «حورەوگرافيا» نوميناتسيالارى بويىنشا ءوتتى.
فەستيۆالدىڭ نەگىزگى ماقساتى - جاستاردىڭ رۋحاني مادەنيەتى مەن شىعارماشىلىعىن دامىتۋ، شىعارماشىل جاستار اراسىندا تاجىريبە الماسۋ مۇمكىندىگىن قالىپتاستىرۋ، دارىندى ورىنداۋشىلار مەن جاس تالانتتاردى ايقىنداۋ جانە قولداۋ. فەستيۆالعا وڭىرگە بەلگىلى تۇلعالار تورەشى بولدى جانە ەلوردادان قوناقتار شاقىرىلدى. سولاردىڭ ءبىرى قر پارلامەنتى ءماجىلىسىنىڭ دەپۋتاتى ايجان سقاقوۆا شاراعا قاتىسىپ، جاستارعا سەنىم مەن ۇكىلى ءۇمىت تىلەپ، ىستىق ىقىلاسىن بىلدىرگەن.
«جاستار شىعارماشىلىعى» بايقاۋىندا جۇلدەلى ورىن العان جەڭىمپازدارعا كەلسەك، «اسپاپتا ويناۋ» نوميناتسياسى بويىنشا باس جۇلدەنى ماڭعىستاۋ ونەر كوللەدجىنىڭ «ناۋاي» فولكلورلىق ءانسامبلى السا، ءى ورىندى ماڭعىستاۋ ونەر كوللەدجىنىڭ ستۋدەنتۋ قۋانعالي لاشىن يەمدەندى. ءىى ورىندى Yessenov University-نەن «جاس ورەن» دومبىراشىلار ءانسامبلى السا، ءىىى ورىندى Yessenov University-نەن دانيلوۆا كارينا يەمدەندى. ال ماڭعىستاۋ ونەر كوللەدجى ستۋدەنتى اقنۇر امانعاليقىزى مەن ماڭعىستاۋ ونەر كوللەدجى ستۋدەنتى ۇلداناي شوڭاي لاۋرەات اتاندى.
«ءداستۇرلى ءان» نوميناتسياسى بويىنشا باس جۇلدەنى يندەر بالالار ونەر مەكتەبىنىڭ تۇلەگى جامبىلوۆا قاراقات يەلەنسە، ءى ورىندى ف.وڭعارسىنوۆا اتىنداعى مادەنيەت ءۇيىنىڭ ونەرپازى داناتار مەرۋەرت الدى. ءىى ورىندى قىزىلتوبە اۋىلىنىڭ ورتا مەكتەبىنىڭ وقۋشىسى دۇيسەنباەۆا جادىرا الدى. ءىىى ورىندى Yessenov University-نەن سۇڭعات قوناقباەۆقا بۇيىردى.
«ەسترادالىق ۆوكال» نوميناتسياسى بويىنشا باس جۇلدەنى Yessenov University-نەن اياتوۆا الينا السا، ءى ورىندى Yessenov University-نەن بەرىكباەۆا راۋلانا يەمدەندى. ءىى ورىنعا Yessenov University-نەن جەتكىزگەن قۋانىشبەك جايعاسسا، ءىىى ورىندى اقشۇقىر مەكتەپ ليتسەيىنىڭ كەنجەعالي قۇرمان جەڭىپ الدى. ال اقتاۋداعى «وقۋشى ورتالىعىنىڭ» «Nur Band» ءانسامبلى لاۋرەات اتاندى.«حورەوگرافيا» نوميناتسياسى بويىنشا باس جۇلدەنى ماڭعىستاۋ ونەر كوللەدجىنىڭ ستۋدەنتتەرى «ايشا قىز» بي ءانسامبلى الدى. ءى ورىندى Yessenov University ستۋدەنتى تولەگەنوۆا گۇلدانا يەلەندى. ال ءىى ورىندى ماڭعىستاۋ ونەر كوللەدجىنەن مازيەۆا اقبوتا جەڭىپ الدى. ءىىى ورىنعا Yessenov University-ءنىڭ «اقكەربەز» بي ءانسامبلى مەن ماڭعىستاۋ ونەر كوللەدجى «بيس» بي ءانسامبلى جايعاستى.
"ادىرنا" ۇلتتىق پورتالى.
