حالىقارالىق ۆاليۋتا قورىنىڭ (حۆق) ساراپشىلارى ۋكرايناداعى وقيعالار مەن رەسەيگە قارسى سانكتسيالارعا بايلانىستى قازاقستانداعى ەكونوميكالىق ءوسىم تۋرالى بولجام جاسادى، دەپ حابارلايدى "ادىرنا" ۇلتتىق پورتالى "Tengrinews.kz"-كە سىلتەمە جاساپ.
حۆق تاياۋ شىعىس جانە ورتالىق ازيا ەلدەرى دەپارتامەنتىنىڭ ديرەكتورى دجيحاد ازۋردىڭ پىكىرىنشە، رەسەيگە قارسى حالىقارالىق سانكتسيالار كاۆكاز بەن ورتالىق ازيا ەلدەرىنىڭ ەكونوميكاسىنا دا اۋىر سوققى بولادى.
"ورتالىق ازيا ەلدەرى گەوگرافيالىق جاقىندىعىن، رەسەيمەن تىعىز ساۋدا جانە قارجىلىق بايلانىستارىن، اقشا اۋدارىمدارى مەن تۋريزمگە تاۋەلدىلىگىن، سونداي-اق، ايىرباس باعامىنا بايلانىستى اسەرلەردى ەسكەرە وتىرىپ، الەۋەتى وسال ەلدەر قاتارىنا كىرەدى. سونىمەن قاتار، ايماق ەلدەرى ۋكراينامەن ساۋدا بايلانىستارىن جۇرگىزەدى جانە شيكىزات پەن ازىق-تۇلىك باعاسىنىڭ وسۋىنە، سونداي-اق، قارجىلىق جاعدايدىڭ كۇشەيۋىنە قاتىستى جاھاندىق قايتالاما اسەرگە ۇشىرايدى. ۋكرايناداعى سوعىستىڭ جان-جاقتى اسەرى بيىل تاياۋ شىعىس پەن ورتالىق ازيا ەلدەرىنىڭ ەكونوميكالىق ءوسىمىن ەداۋىر السىرەتتى", - دەدى ول.
جاقىندا قور جاريالاعان ەكونوميكا دامۋى پەرسپەكتيۆاسى بولجامىنا سايكەس، ناقتى ءجىو ءوسىمى 2022 جىلى 2,6 پايىزعا تومەندەيدى. سونىمەن قاتار، ساراپشىلار وڭىردە ينفلياتسيا بيىل 10,7 پايىزعا دەيىن ارتادى دەپ بولجاپ وتىر.
"الايدا بۇل شوك سالدارى وڭىرلەردە ءارتۇرلى بايقالادى جانە ەنەرگيا رەسۋرستارىنىڭ ەكسپورتتاۋشىلار، مىسالى ازەربايجان مەن قازاقستان مۇناي مەن گاز باعاسىنىڭ وسۋىنەن پايدا كورىپ، سوعىستىڭ كەيبىر نەگاتيۆ سالدارىنىڭ ورنىن جابادى. وسى ەلدەردەن رەسەيگە نەمەسە ونىڭ اۋماعى ارقىلى ەنەرگيا رەسۋرستارىن ەكسپورتتاۋعا قاۋىپ ءتونۋى مۇمكىن. سونىمەن قاتار، ارمەنيا، گرۋزيا جانە قىرعىزستان سياقتى ەنەرگيا رەسۋرستارىن يمپورتتاۋشى ەلدەر ەكونوميكاسىنىڭ ءوسۋ بولجامى شيكىزات تاۋارلارىنا باعانىڭ ءوسۋ اسەرىن ەسكەرە وتىرىپ ايتارلىقتاي تومەندەدى", - دەيدى ازۋر.
ودان بولەك، مامان بارلىق وڭىردە ازىق-تۇلىك قاۋىپسىزدىگىنە قاتىستى الاڭداۋشىلىق ازىق-تۇلىكتىڭ الەمدىك باعاسىنىڭ وسۋىنە بايلانىستى ءوسىپ جاتقانىن جانە رەسەيدەن جەتكىزىلىمدەر ايماقتاعى ازىق-تۇلىك يمپورتىنىڭ 20 پايىزدان اساتىنىن، ال كەيبىر ەلدەر رەسەيدەن دە، ۋكراينادان دا بيداي جەتكىزىپ، تاۋەلدى بولىپ وتىرعانىن اتاپ ءوتتى.
ەكونوميستىڭ سوزىنشە، پاندەميامەن بايلانىستى داعدارىس، ماكروەكونوميكالىق ساياساتتىڭ مۇمكىندىكتەرىن شەكتەي وتىرىپ، ينفلياتسيا مەن قارىز دەڭگەيىنىڭ جوعارىلاۋىنا اكەلدى.
"ادىرنا" ۇلتتىق پورتالى.
