الماتىدا تۇرىك ينۆەستورلارىنىڭ قولداۋىمەن جاڭا فارماتسەۆتيكالىق كاسىپورىن سالۋ جوسپارلانۋدا. بۇل تۋرالى قر دەنساۋلىق ساقتاۋ ءمينيسترى اجار گينيات مالىمدەدى، دەپ حابارلايدى "ادىرنا" ۇلتتىق پورتالى "Anadolu" باسىلىمىنا سىلتەمە جاساپ.
ءتيىستى كەلىسىم تۇرىكتىڭ اتاقتى Atabay Kimya Sanayi Ticaret كومپانياسىمەن جاسالدى. كاسىپورىنعا سالىناتىن ينۆەستيتسيا 10 ميلليون دوللاردى قۇرايدى.
"بۇل — تۇركيا مەن ەۋروپاداعى تانىمال فارماتسەۆتيكالىق كومپانيا. قازىر ول ءدارى-دارمەكتىڭ 20-دان استام ءتۇرىن تىركەپ، ەلىمىزدە وسى پرەپاراتتاردى شىعارۋعا دايىن. اڭگىمە ءارتۇرلى دارىلەر تۋرالى بولىپ وتىر: قابىنۋعا قارسى، انتيبيوتيكتەر، اۋىرسىنۋدى باساتىن، – دەدى مينيستر.
تۇركيانىڭ Nobel Ilac فارماتسەۆتيكالىق كومپانياسى دا قازاقستانعا ينۆەستيتسيا سالۋعا دايىن ەكەنى حابارلاندى.
ءمينيستردىڭ ايتۋىنشا، اڭگىمە ءدارى-دارمەكتىڭ دامۋى، سونداي-اق ونكولوگيالىق اۋرۋلارعا ارنالعان پرەپاراتتاردى شىعارۋ ءۇشىن كلينيكالىق سىناقتار جۇرگىزۋ تۋرالى بولىپ وتىر. "ولار ءبىزدىڭ ەلگە 50 ميلليون دوللاردان استام ينۆەستيتسيا سالۋعا دايىن", - دەدى مينيستر.
جوبانى ىسكە اسىرۋ مەرزىمى — 2023-2025 جىلدار.
"ادىرنا" ۇلتتىق پورتالى
