17 مامىردا «Deutschە Allgemeine Zeitung» باس رەداكتورى، الماتى قالاسى قازاقستان حالقى اسسامبلەياسى جۋرناليستەر كلۋبىنىڭ ءتورايىمى كليمەنكو ولەسيا سەرگەەۆنا قازاقستان ينجەنەرلىك-تەحنولوگيالىق ۋنيۆەرسيتەتىنە كەلىپ، ۇجىممەن جانە ستۋدەنتتەرمەن كەزدەستى.
بۇل جيىندا مەملەكەت باسشىسى ۇسىنعان ساياسي جانە قۇقىقتىق رەفورمالار كەڭىنەن تالقىلاندى. جيىننىڭ اشىلۋىندا قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا الداعى وتەتىن رەفەرەندۋمنىڭ ەل تاريحى ءۇشىن ماڭىزدىلىعىن اتاپ، كونستيتۋتسياعا وزگەرىستەر مەن تولىقتىرۋلار ەنگىزۋ جونىندە رەفەرەندۋم دەموكراتيالىق جولدىڭ ايقىن كورىنىسى دەگەن پىكىرىن ءبىلدىردى.
ەل بولاشاعىندا ماڭىزدى ورىن الاتىن رەفەرەندۋم جايلى كەزدەسۋ وتكىزۋگە ارنايى كەلگەن «Deutschە Allgemeine Zeitung» باس رەداكتورى، الماتى قالاسى قازاقستان حالقى اسسامبلەياسى جۋرناليستەر كلۋبىنىڭ ءتورايىمى كليمەنكو ولەسيا سەرگەەۆناعا العىسىن جەتكىزدى.
"قازيتۋ ۇجىمىنىڭ جاڭا قازاقستاندى قۇرۋ جولىنداعى دەموكراتيالىق وزگەرىستەر ءۇشىن داۋىس بەرۋگە بەلسەندىلىگى زور. مەملەكەت باسشىسىنىڭ قازاقستان كونستيتۋتسياسىنا وزگەرىستەر مەن تولىقتىرۋلار ەنگىزۋ بويىنشا رەسپۋبليكالىق رەفەرەندۋم وتكىزۋ تۋرالى باستاماسىن قولدايدى جانە بارشا قازاقستاندىقتاردى 5 ماۋسىمداعى رەفەرەندۋمعا قاتىسۋعا شاقىرادى. رەفەرەندۋم قوعامنىڭ دەموكراتيالىق پروتسەستەرگە ارالاسۋىنا، جاڭا قازاقستاندى قۇرۋ جولىنداعى دەموكراتيالىق وزگەرىستەرگە جول اشۋعا ۇلكەن مۇمكىندىك", - دەيدى رەكتور گۇلنار الىبەكقىزى.
ءوز كەزەگىندە ولەسيا كليمەنكو كونستيتۋتسياعا ۇسىنىلىپ وتىرعان وزگەرىستەر مەن تولىقتىرۋلار ءاربىر ازاماتتىڭ نەگىزگى قۇقىقتارى مەن كەپىلدىكتەرىن، قوعامداعى تۇراقتىلىق پەن بىرلىكتى قورعاۋعا باعىتتالعانىن ايتتى. مۇنداي رەفەرەندۋم تاريحي ءسات ەكەنىن، تاۋەلسىز قازاقستان تاريحىندا ورىن الىپ وتىرعان ەرەكشە ساياسي ماڭىزدى وزگەرىستەردىڭ نەگىزى ەكەنىن جەتكىزدى. پروفەسسور، ف.ع.ك.، كوتوشەۆا كايني كەنجەتايقىزى، ۇلكەن ەلدىك وزگەرىستىڭ، دامۋدىڭ جاڭا كەزەڭىنىڭ داڭعىل جولىنا تۇسكەن قازاقستاننىڭ ءار تۇرعىنى ءۇشىن رەفەرەندۋمدا داۋىس بەرۋ وتە ماڭىزدى دەپ سانايدى. بۇل جيىندا ستۋدەنتتەر دە ءوز ويلارىن ورتاعا سالدى.
باقىلاۋ كەڭەسىنىڭ مۇشەسى ، قازيتۋ-دىڭ 2 كۋرس ستۋدەنتى باقداۋلەت ەرتۋعانوۆ وزگەرىستەر مەن جاڭعىرۋلارعا جول اشاتىن رەفەرەندۋمدا، اسىرەسە، جاستاردىڭ جاۋاپكەرشىلىك سەزىنۋى ماڭىزدى دەپ ەسەپتەيدى. بولاشاق - جاستاردىڭ قولىندا، بۇگىنگى ءاربىر اتقارار ءىسىمىز جارقىن بولاشاقتىڭ ىرگەسىن قالاۋعا نەگىز بولۋى كەرەك دەيدى. ول ءوز زامانداستارىن جارقىن بولاشاق ءۇشىن داۋىس بەرۋگە شاقىردى.
