حيميادان 56-شى حالىقارالىق مەندەلەەۆ وليمپياداسىندا قازاقستاندىق وقۋشىلار 3 كۇمىس، 5 قولا مەدال جەڭىپ الدى. زياتكەرلىك سايىستار 9-16 مامىر ارالىعىندا تاشكەنتتە ءوتتى دەپ حابارلايدى “ادىرنا” ۇلتتىق پورتالى بعم ءباسپاسوز قىزمەتىنە سىلتەمە جاساپ.
قازاقستان قۇراماسى اتىنان قاراعاندى، اقتاۋ، نۇر-سۇلتان، وسكەمەن، پاۆلودار جانە اقتوبە وبلىستارىنان 10 جانە 11-سىنىپتاردىڭ 12 وقۋشىسى قاتىستى. ولار تمد، بالتىق جانە وڭتۇستىك-شىعىس ەۋروپا ەلدەرىنىڭ قۇرداستارىمەن ءبىلىم سايىسىندا باق سىناستى.
«ءبىلىم جانە عىلىم مينيسترلىگى وقۋشىلارىمىزعا باسقا ەلدەردەگى قۇرداستارىمەن باسەكەلەسۋگە مۇمكىندىگىن ارتتىرۋ ءۇشىن بارلىق جاعدايدى جاساپ جاتىر. كۇنى كەشە بالالارىمىز العاش رەت فرانتسياداعى دۇنيەجۇزىلىك گيمنازياداعا اتتانعانىن بىلەسىزدەر. وزبەكستاندا وتكەن مەندەلەەۆ وليمپياداسىنىڭ جۇلدەگەرلەرى قابىلداۋ ەمتيحاندارىن تاپسىرماي-اق رەسەيدىڭ جەتەكشى جوعارى وقۋ ورىندارىندا تەگىن وقۋعا مۇمكىندىك الادى. قازاقستان قۇراماسىن ەل ىشىندەگى وليمپيادالاردىڭ «ەلەگىنەن» وتكەن وقۋشىلار تانىستىردى. تاشكەنتكە 2022 جىلعى رەسپۋبليكالىق وليمپيادانىڭ جەڭىمپازدارى مەن جۇلدەگەرلەرى باردى. سونداي-اق، ولار – بىرنەشە رەت وقۋ-جاتتىعۋ جيىندارىندا ەڭ جوعارى ناتيجە كورسەتكەن وليمپيادالىق رەزەرۆتىڭ مۇشەلەرى. ايتا كەتسەك، بيىل ءبىز كوماندانى ۇزدىكتەردىڭ ۇزدىگى تانىستىرۋى ءۇشىن بارلىق دەڭگەيدەگى وليمپيادانى وتكىزۋ پروتسەسىن اۆتوماتتاندىردىق»، – دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشەۆ.
حيميا ءپانى بويىنشا وقۋشىلاردىڭ حالىقارالىق مەندەلەەۆ وليمپياداسى جىل سايىن جۇزدەگەن تالانتتى حيميكتەردىڭ باسىن قوسادى.
“ادىرنا” ۇلتتىق پورتالى
