الماتى وبلىسىنىڭ تەكەلى قالاسىندا قاتتى سەل ءجۇرىپ، كوشەلەر مەن ۇيلەردى باسىپ قالدى. توتەنشە جاعدايدان 5 جاسار قىز ءىز-ءتۇسسىز كەتتى. بۇل تۋرالى وبلىستىق تجد ءباسپاسوز قىزمەتى مالىمدەدى، دەپ حاباپلايدى “ادىرنا” ۇلتتىق پورتالى.
تەكەلىدەگى سەلدىڭ قاتتى بولعانى سونشا، لاي سۋ قالا كوشەلەرى مەن ۇيلەردى بۇلدىرگەن. قازىر وقيعا ورنىندا قۇتقارۋشىلار جۇمىس ىستەپ جاتىر.
"ساعات 12: 00-دە قوناەۆ كوشەسى بويىنشا 350, 348 ۇيلەر اۋدانىندا توپىراقتىڭ قاتتى ىلعالدانۋى ناتيجەسىندە كوشكىن ءجۇرىپ، تۇرعىن ۇيلەرگە بالشىق باسىپ قالعانى تۋرالى حابارلاما كەلىپ ءتۇستى. ءۇي يەلەرىنىڭ ايتۋىنشا، 5 جاسار قىزى حابار-وشارسىز كەتكەن. جەرگىلىكتى اتقارۋشى ورگاندار ماسەلەنى جويۋ جونىندە جەدەل شتاب قۇردى. زارداپ شەككەن وتباسىلار قاۋىپسىز جەرگە كوشىرىلەتىن بولادى", - دەپ مالىمدەدى وبلىستىق تجد ءباسپاسوز قىزمەتى.
ازىرگە ونىڭ ومىرىنە قاتىستى ناقتى اقپارات جوق. سەلدەن قانداي شىعىن كەلگەنى ازىرگە بەلگىسىز. وقيعا ورنىندا ماماندار مەن قۇتقارۋشىلار جۇمىس ىستەپ جاتىر.
“ادىرنا” ۇلتتىق پورتالى
