ىشكى ىستەر ءمينيسترى مارات احمەتجانوۆ نۇرلان ءماسىموۆتىڭ ءىسى بويىنشا پاۆلودار وبلىسى پد باستىعىنىڭ بۇرىنعى ورىنباسارى مەن بىرنەشە كاسىپكەر ۇستالعانىن ايتتى، دەپ حابارلادى “ادىرنا” ۇلتتىق پورتالى.
«پاۆلودار وبلىسىندا بۇرىنعى باسشىنىڭ قاتىسى بار – پوليتسيا دەپارتامەنتىنىڭ باسشىسى مەن ونىڭ ورىنباسارى، ولار بيۋدجەت قاراجاتىن جىمقىردى دەگەن كۇدىككە ءىلىندى. ولار تەرگەۋ دەرەكتەرى بويىنشا ماتەريالدىق-تەحنيكالىق قۇرالداردى ساتىپ الۋدى اسىرا باعالاعان. سونىمەن قاتار، سوت سانكتسياسىمەن ۇستالعاندار بار. وسى تەحنيكانى جەتكىزۋ ءۇشىن ءسوز بايلاسىپ جۇرگەن بىرقاتار كاسىپكەرلەر قاماۋعا الىندى»، – دەدى احمەتجانوۆ.
سونداي-اق، ول جوعارى لاۋازىمدى تۇلعالارمەن ءسوز بايلاسۋ ارقىلى پوليتسياعا قۇرال-جابدىق جەتكىزىپ، قىلمىستىق قۋدالاۋ وربيتاسىنا شىعىپ، سوت سانكتسياسىمەن قاماۋعا الىنعان كاسىپكەرلەر تۋرالى دا ايتتى. قازىر تەرگەۋ ءجۇرىپ جاتىر. ول سىبايلاس جەمقورلىق فاكتىلەرى رەسپۋبليكانىڭ باسقا وڭىرلەرىندە دە انىقتالعانىن ايتتى.
ءساۋىر ايىنىڭ باسىندا سىبايلاس جەمقورلىققا قارسى قىزمەت پاۆلودار وبلىسى بويىنشا پد باستىعىنىڭ ورىنباسارىنىڭ ۇستالعانىن حابارلادى. سوتقا دەيىنگى تەرگەپ-تەكسەرۋ قر قىلمىستىق كودەكسىنىڭ 189-بابىنىڭ 4-بولىگى (باسقانىڭ سەنىپ تاپسىرىلعان بوتەننىڭ مۇلكىن يەمدەنىپ الۋ نەمەسە يەمدەنۋ) بويىنشا جۇرگىزىلۋدە. وسى باپ بويىنشا كىنالىلەر 7 جىلدان 12 جىلعا دەيىن باس بوستاندىعىنان ايىرىلۋى مۇمكىن.
ايتا كەتسەك، 22 ساۋىردە نۇرلان ءماسىموۆ اسا ءىرى كولەمدە پارا الدى دەگەن كۇدىككە ءىلىندى. سوت ونى قاماۋعا الۋعا سانكتسيا بەرىپ، ىزدەۋ جاريالاندى.
”ادىرنا” ۇلتتىق پورتالى
