«قازمۇنايگاز» ۇق اق باسقارما توراعاسى ماعزۇم مىرزاعاليەۆ اقتاۋ قالاسىندا ەنشىلەس جانە تاۋەلدى ۇيىمدار (ەتۇ) باسشىلىعىمەن كەڭەيتىلگەن جيىن وتكىزدى.
م. مىرزاعاليەۆ ەنشىلەس كاسىپورىن باسشىلارىنىڭ قىزمەت بارىسى مەن جۇمىس جوسپارلارى تۋرالى باياندامالارىن تىڭداپ، ەرەكشە نازارعا الاتىن بىرنەشە ماسەلەلەردى اتاپ ءوتتى. الدىمەن، "وزەنمۇنايگاز" اق، "ماڭعىستاۋمۇنايگاز" اق جانە "قاراجانباسمۇناي" اق ءبىرىنشى باسشىلارىنا وسى جىلدىڭ سوڭىنا دەيىن بەكىتىلگەن كورسەتكىشتەرگە سايكەس مۇناي ءوندىرۋ جانە تاپسىرۋ جوسپارىنىڭ تولىققاندى ورىندالۋىن قامتاماسىز ەتۋدى تاپسىردى.
بۇل باسقوسۋدا ەڭبەك قاۋىپسىزدىگىن قامتاماسىز ەتۋ جانە جاراقاتتانۋ دەڭگەيىن تومەندەتۋ ماسەلەلەرى ەرەكشە نازارعا الىندى. م. مىرزاعاليەۆ بۇل - ەنشىلەس كاسىپورىنداردىڭ باسشىلارى ءۇشىن باستى مىندەت ەكەنىن ايتا وتىرىپ، ماسەلەنى قاتاڭ باقىلاۋدا ۇستاۋدى تاپسىردى.
وڭىردەگى الەۋمەتتىك تۇراقتىلىقتى قامتاماسىز ەتۋ ماقساتىندا قمگ باسقارما توراعاسى ەڭبەك ۇجىمدارىمەن تۇراقتى ەسەپ بەرۋ كەزدەسۋلەرىن ءجيى ۇيىمداستىرىپ تۇرۋدى مىندەتتەدى. بار مەكەمەلەردەن ەڭبەك زاڭناماسىنىڭ قاتاڭ ساقتالۋىن تالاپ ەتتى. "بۇل ماسەلە جۇمىس بەرۋشىگە دە، جۇمىسشىلارعا دا ورتاق تالاپ. ەڭبەك شارتى مەن ءتارتىپ بۇزۋ جايتتەرىن تەجەپ، جاۋاپتى باسشىلار تاراپىنان بۇل ماسەلەگە سالعىرت قاراۋ فاكتىلەرىن بولدىرماۋ قاجەت", - دەپ اتاپ ءوتتى مىرزاعاليەۆ
جيىن بارىسىندا “وزەنمۇنايگاز” اق باسشىلىعىنا ءوندىرىس ورىندارىنداعى ەلەكتروەنەرگيانىڭ اپاتتىق اجىراتۋ ماسەلەسىن جۋىق ارادا شەشۋ مىندەتى جۇكتەلدى. بۇل مەجەلەنگەن جوسپارلىق كورسەتكىشتەرگە جەتۋگە زور ىقپالىن تيگىزەتىن ماڭىزدى فاكتورلاردىڭ ءبىرى ەكەنى ەسكەرتىلدى.
مىرزاعاليەۆ جاڭا ۇڭعىمالاردى بۇرعىلاۋ پروتسەسىن جاقسارتۋ، مەن مۇناي الۋ كوەففيتسيەنتىن ارتتىرۋ ءۇشىن عىلىمي ينستيتۋتتارعا جۇگىنۋ جانە زاماناۋي عىلىمي-وندىرىستىك ادىستەردى قولدانۋ قاجەتتىگىن دە اتاپ ءوتتى.
باسقارما توراعاسى قاراجانباس كەن ورنىنداعى سۋدى تۇششىلاندىرۋ زاۋىتىن پايدالانۋعا بەرۋ مەرزىمىن كەشىكتىرۋ ماسەلەسىنە بولەك توقتالدى. زاۋىتتى ىسكە قوسۋ جۇمىسىن جەدەلدەتۋدى تاپسىردى.
سونداي-اق، م.مىرزاعاليەۆ بارلىق ەتۇ باسشىلارىنا ءبىر كوزدەن ساتىپ الۋ كولەمىن ازايتۋ ماسەلەسىن قولعا الۋ كەرەك ەكەندىگىن اتاپ ءوتتى.
