يتاليا بيلىگى مارينا دي كاررارا پورتىندا تۇرعان "شاحەرەزادا" سۋپەرياحتاسىن تۇتقىندادى. بۇل كەمە ەل ىشىندە رەسەي باسشىسى ۆلاديمير پۋتينگە تيەسىلى دەپ ايتىلادى، دەپ حابارلايدى "ادىرنا" ۇلتتىق پورتالى "ازاتتىققا" سىلتەمە جاساپ.
يتاليا بيلىگىنىڭ مالىمەتىنشە، قارجى پوليتسياسىنىڭ تەرگەۋ ناتيجەسىنەن كەيىن كەمەنىڭ "رەسەيدىڭ جوعارى لاۋازىمدى تۇلعالارى مەن ەۋرووداق سانكتسياسىنا ىلىنگەن ادامدارمەن" بايلانىستى ەكەنى انىقتالعان. حابارلامادا كەمەنىڭ ناقتى كىمگە تيەسىلى ەكەنى ايتىلمايدى.
تاۋەلسىز باعالاۋشىلاردىڭ پىكىرىنشە، شامامەن 700 ملن دوللار تۇراتىن 140-مەترلىك كەمەدە بىرنەشە اي بويى جوندەۋ جۇمىستارى جۇرگىزىلگەن. ول كەلەسى جىلدىڭ باسىندا اياقتالۋى ءتيىس بولعان. New The York Times باسىلىمىنىڭ جازۋىنشا، وسى اپتادا ياحتا كەمە جوندەيتىن ورىننان كەتىپ، تەڭىزگە شىعۋعا دايىندالعان. الايدا يتاليا بيلىگى ونى كەمەگە قاتىستى تۇپكىلىكتى شەشىم شىققانعا دەيىن پورتتان جىبەرمەگەن.
وپپوزيتسيالىق ساياساتكەر الەكسەي ناۆالنىيدىڭ جاقتاستارى زەرتتەۋلەرىندە كەمە ۆلاديمير پۋتينگە تيەسىلى دەگەن قورىتىندى جاساعان. يتاليانىڭ La Stampa باسىلىمى كەمە "روسنەفت" كومپانياسىنىڭ بۇرىنعى باسشىسى ەدۋارد حۋيداناتوۆقا تيەسىلى دەپ جازعان. بريتاندىق Guardian باسىلىمى دەرەككوزىنىڭ ايتۋىنشا، سۋپەرياحتانىڭ شىنايى يەسىن انىقتاۋ مۇمكىن ەمەس، سەبەبى ول كوپتەگەن كومپانيامەن بايلانىستى.
كەيىنگى اپتالاردا ەۋرووداق اۋماعىنداعى پورتتاردا رەسەيدىڭ ۋكرايناعا باسىپ كىرۋىنە قارسى جاريالانعان سانكتسيا اياسىندا بىرنەشە سۋپەرياحتا تۇتقىندالعان. كەمەلەرى تۇتقىندالعان رەسەيلىك ميللياردەرلەر اراسىندا الەكسەي مورداشوۆ، گەننادي تيمچەنكو، الىشەر وسمانوۆ، ۆيكتور ۆەكسەلبەرگ بار.
ءساۋىر ايىنىڭ سوڭىندا اقش-تا كرەملمەن بايلانىستى وليگارحتاردىڭ اكتيۆتەرىن كامپەسكەلەپ، ودان تۇسكەن قارجىنى ۋكرايناعا گۋمانيتارلىق كومەككە باعىتتاۋدى قاراستىراتىن زاڭ جوباسى ەنگىزىلگەن.
"ادىرنا" ۇلتتىق پورتالى.
