بۇگىن پرەزيدەنت ق.توقاەۆ "رەسپۋبليكالىق رەفەرەندۋم" تۋرالى زاڭعا وزگەرتۋلەر ەنگىزۋ تۋرالى جارلىققا قول قويىپ، حالىققا بەينەۇندەۋ جولدادى دەپ حابارلايدى "ادىرنا" ۇلتتىق پورتالى.
پرەزيدەنت بەينەۇندەۋدە مىنا ماسەلەلەرگە توقتالدى:
– بۇكىل پروگرەسسيۆتى الەمدە پلەبيستسيت — تىكەلەي دەموكراتيانىڭ ەڭ كورنەكتى جانە ايقىن نىساندارىنىڭ ءبىرى. الايدا قازاقستاندا دەموكراتيانىڭ بۇل ءتيىمدى ينستيتۋتى تولىق پايدالانىلمادى.
– جاڭا قازاقستاندى قۇرۋ، دامۋدىڭ جاڭا كەزەڭىندە ءبىز ەلىمىز ءۇشىن وسىنداي تاعدىرلى شەشىمدەردى كوپشىلىك الدىندا قابىلداۋعا ءتيىسپىز.
– كونستيتۋتسيالىق تۇزەتۋلەر جوباسىنا ازاماتتاردىڭ جالپىعا بىردەي داۋىس بەرۋى ءبىزدىڭ دەموكراتيالىق قاعيداتتارعا بەرىكتىگىمىزدى كورسەتەدى.
– الداعى رەفەرەندۋم قازاقستاننىڭ بولاشاعىن ايقىندايتىن تاريحي وقيعاعا ءاربىر ازاماتتىڭ تىكەلەي قاتىسۋىنا مۇمكىندىك بەرەدى.
– تۇزەتۋلەر باسقارۋدىڭ «سۋپەرپرەزيدەنتتىك» تۇرىنەن ىقپالدى پارلامەنت پەن ەسەپ بەرەتىن ۇكىمەتى بار پرەزيدەنتتىك رەسپۋبليكاعا تۇپكىلىكتى كوشۋدى بىرىكتىرۋگە ارنالعان. كونستيتۋتسيالىق رەفورما بيلىكتىڭ وكىلدى تارماعىن ايتارلىقتاي نىعايتادى، تەجەمەلىك جانە تەپە-تەڭدىك جۇيەسىن نىعايتادى، ءماسليحاتتاردىڭ سۋبەكتيۆتىلىگىن ارتتىرادى.
– ءماجىلىس پەن وبلىستىق ءماسليحاتتار دەپۋتاتتارىن سايلاۋدىڭ ارالاس ماجوريتارلىق-پروپورتسيونالدى ۇلگىسىن ەنگىزۋ سايلاۋشىلاردىڭ كوزقاراستارى مەن پىكىرلەرىنىڭ بارلىق سپەكترىن تولىق قامتۋعا مۇمكىندىك بەرەدى.
– كونستيتۋتسيانىڭ جاڭا رەداكتسياسىندا پرەزيدەنتتىڭ بارلىق ساياسي پارتيالار مەن قوزعالىستاردان تەڭ دارەجەلى مارتەبەسىن بەكىتۋ كوزدەلۋدە.
– پرەزيدەنتتىڭ ەڭ جاقىن تۋىستارىنىڭ ساياسي قىزمەت پەن كۆازيمەملەكەتتىك سەكتوردا باسشىلىق قىزمەتتەردى اتقارۋىنا تىيىم سالىنادى.
- تۇزەتۋلەردىڭ ماڭىزدى بلوگى ادام قۇقىقتارى سالاسىنا قاتىستى.
– كونستيتۋتسيالىق سوتتىڭ قۇرىلۋى، ادام قۇقىقتارى جونىندەگى ۋاكىلدىڭ مارتەبەسىن كونستيتۋتسيالىق دەڭگەيدە بەكىتۋ، ءولىم جازاسىنا ءسوزسىز تىيىم سالۋ – بۇل قادامداردىڭ بارلىعى ازاماتتاردىڭ قۇقىقتارى مەن بوستاندىقتارىن جان-جاقتى ساقتاۋعا باعىتتالعان.
"ەلىمىزدىڭ ەرتەڭى، ۇرپاق بولاشاعى ءۇشىن بارشاڭىزدى رەفەرەندۋمعا بەلسەندى قاتىسۋعا شاقىرامىن! ۇلتتىق مۇددەمىزگە نەگىزدەلگەن بارلىق باستامالاردى قولدايتىنىڭىزعا سەنىمدىمىن. ەلىمىزدىڭ جارقىن بولاشاعى ءوز قولىمىزدا! بىرلىك – ءبىزدىڭ كۇشىمىز!", - دەدى قاسىم-جومارت توقاەۆ.
"ادىرنا" ۇلتتىق پورتالى.
