بۇگىن تۇنگى ساعات 03.54-تە اقمولا وبلىسى كراسنىي يار اۋىلىندا ەكى قاباتتى ءۇي ورتەنىپ، سالدارىنان ءتورت ادام قازا تاپتى، دەپ حابارلايدى "ادىرنا" ۇلتتىق پورتالى "aikyn.kz"-كە سىلتەمە جاساپ.
اقمولا وبلىسى توتەنشە جاعدايلار دەپارتامەنتىنىڭ مالىمەتىنشە، وقيعا ورنىنا ءورت سوندىرۋشىلەر ءۇش مينۋتتا جەتكەن. قۇتقارۋشىلار كەلگەنشە 1964 جىلى تۋعان ايەل مەن ونىڭ 2015 جىلى تۋعان نەمەرەسى تەرەزە ارقىلى پاتەردەن شىعىپ ۇلگەرگەن.
— ءورت ورنىنان 1991 جىلى تۋعان ەر جانە 1993 جىلى تۋعان ايەل ادامنىڭ، سونداي-اق ەكى بالانىڭ دەنەسى تابىلدى، – دەيدى قۇتقارۋشىلار.
ءورت اۋدانى 50 شارشى مەتر بولاتىن پاتەردەن شىققان. ەلەكتر سىمدارىنداعى اقاۋ ورتكە سەبەپ بولۋى مۇمكىن. ءورتتى 13 قىزمەتكەر مەن ءۇش تەحنيكامەن ءسوندىردى.
وقيعادان ءبىر كۇن بۇرىن ۇيدەگى ەلەكتر سىمدارى اۋىستىرىلعان. اجەسى مەن نەمەرەسى شەتكى بولمەدە، ەرلى-زايىپتىلار ەگىز بالاسىمەن ەلەكتر سىمى اۋىستىرىلعان بولمەدە بولعان.
"ادىرنا" ۇلتتىق پورتالى
