4 مامىر كۇنى «الاتاۋ» ءداستۇرلى ونەر تەاترىندا كەسەك تالانتتى، ەسىمى ەل اۋزىندا قۇرمەتپەن اتالاتىن تانىمال ايتىسكەر اقىن رينات زايتوۆتىڭ «مەن سەندەردى جاقسى كورەمىن، ادامدار» اتتى مۋزىكالىق كەشى انشلاگپەن ءوتتى. رينات زايتوۆتىڭ جاقىن تۋىستارى، ۇستازدارى، ونەر جۇلدىزدارى دا قاتىستى.
كورەرمەن ويىنىڭ جيەگىن جىرتىپ، الاپات سەزىمگە بولەگەن ولەڭدەرى، اندەرى (اقىننىڭ سوزدەرىنە جازىلعان) كوڭىل پەرنەسىن ءدوپ باسقانداي. اكە، انا، ماحاببات، بالا تاربيەسى، تۋعان جەر، ءومىر، قاڭتار وقيعاسى ت.ب. سان ءتۇرلى تاقىرىپتار قامتىلدى. جولى بىرەۋ بولعانىمەن، بۇرىلىسى كوپ ومىردە ءوز باعىتىن تاپقان اقىننىڭ كەشى پسيحولوگيالىق يىرىمگە قۇرىلىپ، كورەرمەندەردى ەستەتيكالىق-ەموتسيونالدىق كوڭىل-كۇيدە قالدىرىپ، ساي-سۇيەكتەرىن سىرقىراتتى دەسەك ارتىق بولماس. ءسوز بايلىعىن جيناعان حالقىمىزدىڭ ۇلى «مەنىڭ بار جيناعانىم ولەڭ عانا. كەلسىن دە الا بەرسىن، الا السا ەگەر»، – دەپ وتتى سوزدەرىن دە ايتىپ ءوتتى. قازاقتىڭ «ەر جىگىتتىڭ تاعىمەن تالاسساڭ دا، باعىمەن تالاسا المايسىڭ» دەگەنى دە ەرىكسىز ويعا ورالادى ەكەن. «مەن ساعان جامان اكە بولسام داعى، سەن ماعان جامان بالا بولا كورمە»، «مەن سەنىڭ شاراناڭدا جاتقانىمدا، مەن سەنىڭ جۇرەگىڭنەن ۇستاعانمىن» دەگەن سياقتى اكە، انا، ۇرپاققا ارناعان ويلى سوزدەرى تالايدىڭ ەسىندە قالارى انىق. مۋزىكالىق كەش تاپتاۋرىندىقتان ادا ەرەكشە فورماعا قۇرىلعان. ساحنانىڭ ارلەنۋى، دىبىس، جارىقتىڭ قويىلۋى دا ءساتتى.
كەشتە رينات زايتوۆتىڭ سوزدەرىنە جازىلعان «ءومىر جولى» ء(انى: ا.دۇيسەنوۆ), «اكە» ء(انى: ن. شوكەنوۆ), «مەنىڭ قىزىم» ء(انى: ە.ايتىمبەتوۆ), «مەن ونى ويلاسام» ء(انى: س. ەرماحان), «عاجايىپ ءتۇن» ء(انى: ا. سابەتوۆ), «حانشايىمىم-اۋ» ء(انى: ع. شۇرەنبايۇلى), تەرمە (ماقامى حالىقتىكى), «ءومىر-وزەن» ء(انى: ۇ. جولداسوۆ), «انا» ء(انى: ە. ايتىمبەتوۆ), «تۋعان جەر» ء(انى: ا. دۇيسەنوۆ), «ەلگە تىلەك» ء(انى: ن. ابدىرازاقوۆ) اتتى اندەر ورىندالدى. شارانىڭ وتۋىنە جۇلدىزبەك جۇمانباي (قويۋشى رەجيسسەر), ەرمەك مەدەنوۆ (ساكسافون، ۆوكال، بەك-ۆوكال), ازات دۋلاتۇلى (دومبىرا ، ۆوكال، بەك-ۆوكال), اسەت ەسجان (ۆوكال), قۇرالاي ۋتەپوۆا (ۆوكال، بەك-ۆوكال), رۋسلان باعاشار (ۇرمالى اسپاپ), قۇشتار قۋانتايۇلى (گيتارا، بەك-ۆوكال), ايساۋلە قايىرعازينا (ۆوكال، بەك-ۆوكال), نۇربولات قىدىرباەۆ (قىل قوبىز), ايدانا جاكەن (فلەيتا), تۇرسىناي الىبەكقىزى (جەتىگەن), داۋرەن سادىقوۆ (bass گيتارا), اجار قادىلبەكوۆا (پريما-قوبىز), ناريمان ابدراحمانوۆ (ۆوكال، بەك-ۆوكال), ەرسەيىت اليەۆ (جىرشى), ەدىگە بايگەلدين (دىبىس رەجيسسەرى), رۋسلان قۇدايبەرگەنوۆ (جارىقپەن ارلەۋشى) جانە ت. ب. ءوز ۇلەستەرىن قوستى.
شەرحان مۇرتازا «اي مەن جۇلدىز بولماسا، قاراڭعى تۇندە ادامدار اداسار ەدى. ونەر دۇلدۇلدەرى بولماسا، مىنا كۇيبەڭ تىرشىلىكتە ادامداردىڭ كوڭىلىن كىر باسار ەدى»، – دەيدى. قازاق ونەرىن ورگە تارتار ونەر يەلەرى كوپ بولعاي!
قۋانىش جۇمابەكۇلى
«الاتاۋ» ءداستۇرلى ونەر تەاترى
ادەبيەت ءبولىمىنىڭ مەڭگەرۋشىسى
