4 mamyr kúni «Alataý» dástúrli óner teatrynda kesek talantty, esimi el aýzynda qurmetpen atalatyn tanymal aıtysker aqyn Rınat Zaıtovtyń «Men senderdi jaqsy kóremin, adamdar» atty mýzykalyq keshi anshlagpen ótti. Rınat Zaıtovtyń jaqyn týystary, ustazdary, óner juldyzdary da qatysty.
Kórermen oıynyń jıegin jyrtyp, alapat sezimge bólegen óleńderi, ánderi (aqynnyń sózderine jazylǵan) kóńil pernesin dóp basqandaı. Áke, ana, mahabbat, bala tárbıesi, týǵan jer, ómir, Qańtar oqıǵasy t.b. san túrli taqyryptar qamtyldy. Joly bireý bolǵanymen, burylysy kóp ómirde óz baǵytyn tapqan aqynnyń keshi psıhologııalyq ıirimge qurylyp, kórermenderdi estetıkalyq-emoıonaldyq kóńil-kúıde qaldyryp, saı-súıekterin syrqyratty desek artyq bolmas. Sóz baılyǵyn jınaǵan halqymyzdyń uly «Meniń bar jınaǵanym óleń ǵana. Kelsin de ala bersin, ala alsa eger», – dep otty sózderin de aıtyp ótti. Qazaqtyń «Er jigittiń taǵymen talassań da, baǵymen talasa almaısyń» degeni de eriksiz oıǵa oralady eken. «Men saǵan jaman áke bolsam daǵy, sen maǵan jaman bala bola kórme», «Men seniń sharanańda jatqanymda, men seniń júregińnen ustaǵanmyn» degen sııaqty áke, ana, urpaqqa arnaǵan oıly sózderi talaıdyń esinde qalary anyq. Mýzykalyq kesh taptaýryndyqtan ada erekshe formaǵa qurylǵan. Sahnanyń árlenýi, dybys, jaryqtyń qoıylýy da sátti.
Keshte Rınat Zaıtovtyń sózderine jazylǵan «Ómir joly» (áni: A.Dúısenov), «Áke» (áni: N. Shókenov), «Meniń qyzym» (áni: E.Aıtymbetov), «Men ony oılasam» (áni: S. Ermahan), «Ǵajaıyp tún» (áni: A. Sabetov), «Hanshaıymym-aý» (áni: Ǵ. Shúrenbaıuly), Terme (maqamy halyqtiki), «Ómir-ózen» (áni: U. Joldasov), «Ana» (áni: E. Aıtymbetov), «Týǵan jer» (áni: A. Dúısenov), «Elge tilek» (áni: N. Ábdirazaqov) atty ánder oryndaldy. Sharanyń ótýine Juldyzbek Jumanbaı (qoıýshy rejısser), Ermek Medenov (saksafon, vokal, bek-vokal), Azat Dýlatuly (dombyra , vokal, bek-vokal), Áset Esjan (vokal), Quralaı Ýtepova (vokal, bek-vokal), Rýslan Baǵashar (urmaly aspap), Qushtar Qýantaıuly (gıtara, bek-vokal), Aısáýle Qaıyrǵazına (vokal, bek-vokal), Nurbolat Qydyrbaev (qyl qobyz), Aıdana Jaken (fleıta), Tursynaı Álibekqyzy (jetigen), Dáýren Sadyqov (bass gıtara), Ajar Qadylbekova (prıma-qobyz), Narıman Abdrahmanov (vokal, bek-vokal), Erseıit Álıev (jyrshy), Edige Baıgeldın (dybys rejısseri), Rýslan Qudaıbergenov (jaryqpen árleýshi) jáne t. b. óz úlesterin qosty.
Sherhan Murtaza «Aı men juldyz bolmasa, qarańǵy túnde adamdar adasar edi. Óner dúldúlderi bolmasa, myna kúıbeń tirshilikte adamdardyń kóńilin kir basar edi», – deıdi. Qazaq ónerin órge tartar óner ıeleri kóp bolǵaı!
Qýanysh Jumabekuly
«Alataý» dástúrli óner teatry
Ádebıet bóliminiń meńgerýshisi
