تۇركىستان وبلىسىندا ءوز ايەلىن ۇرىپ ءولتىردى دەگەن كۇدىكپەن ءتورت بالانىڭ اكەسى قاماۋعا الىندى. بۇل تۋرالى كتك ارناسى جازدى، دەپ حابارلايدى «ادىرنا» ءتىلشىسى.
قىزعانشاق كۇيەۋ 38 جاستاعى جۇبايىن اراق ىشۋدەن باس تارتقانى ءۇشىن تومپەشتەپ تاستاعان.
اۋىر سوققىدان كوز جۇمعان ۇكىلاي سارتاەۆانىڭ جاقىندارى ەندى كۇيەۋ بالاسىمەن قوسا، ونىڭ شەشەسىن دە جاۋاپقا تارتۋدى تالاپ ەتىپ وتىر.
مارقۇمنىڭ جاقىندارى كۇيەۋ بالاسىنىڭ جۇدىرىق الا جۇگىرەتىنىن بۇرىننان بىلەدى ەكەن. ءتىپتى بىرنەشە مارتە اجىراتىپ الماق بولىپتى. بىراق «بالالارىم ءۇشىن شىدايمىن» دەپ، ايەلدىڭ ءوزى باس تارتقان. «سوڭعى رەت ۇيىنە ءىشىپ كەلگەن وتاعاسى ەكى شولمەك كونياك اكەلىپ، بىرەۋىن ايەلىنىڭ اۋزىنا قۇيعان، ال قارسىلاسقان كەزدە باسىنان بوس بوتەلكەمەن ۇردى" دەيدى تۋىستارى. ەڭ سوراقىسى، جانجال بالالارىنىڭ كوزىنشە بولعان دەسەدى.
"قىزىمدى سۇيرەپ ۇيىنە دەيىن اكەلگەن. بەتىنەن ۇرعان، ءتىسىن سىندىرعان. شاشىنان جۇلعان. شاشتان شاش قالماعان. ءتىستىڭ ءبارىن قاعىپ العان. ول از دەپ، ۇستىنە سەكىرىپ، قىزىمنىڭ قابىرعاسىن سىندىرعان. جۇرەگى مەن وكپەسىن جابىستىرىپ جىبەرگەن. سونداي ايۋاندىقپەن ىستەپ وتىر", - دەيدى مارقۇمنىڭ اناسى قالامقاس سارتاەۆا.
مارقۇمنىڭ تۋىستارى پوليتسيا 40 مينۋتتان كەيىن كەلدى دەپ وكپەلى. ەگەر دەر كەزىندە جەتكەندە ءتورت بالانىڭ اناسىن اراشالاپ قالۋعا بولار ما ەدى دەيدى. ال ءتارتىپ ساقشىلارى ءبىر باپپەن قىلمىستىق ءىس قوزعاپ، كۇدىكتىنىڭ قاماۋعا الىنعانىن حابارلادى.
«كۇدىكتى قىلمىسىن تولىق مويىنداپ، وكىنىشىن ايتۋدا. ايعاق زات رەتىندە الىنعان زاتتارعا قاتىستى سوت ساراپتاماسى تاعايىندالعان. كۇدىكتى پروفيلاكتيكالىق ەسەپتە تۇرمايدى. كورشى جانە تۋىستارىنان وسى كۇنگە دەيىنگى جانجالشۋ بولعانى جايلى ارىز-شاعىم وسى كۇنگە دەيىن تۇسپەگەن»،– دەپ مالىمدەدى تۇركىستان وبلىسى پد تەرگەۋ باسقارماسىنىڭ تەرگەۋشىسى ەدىل التىنباەۆ.
قازىر كامەلەتكە تولماعان ءتورت بالا اجەسىنىڭ قولىندا. اناسىنان ايىرىلعان ەكى ۇل، ەكى قىزعا ەندى پسيحولوگيالىق كومەك قاجەت. بالاقايلار ءوز-وزىنە كەلگەنشە ءبىلىم ءبولىمى تورتەۋىنە دە ونلاين رەجيمدە وقۋعا مۇمكىندىك بەرىپتى. ال «دەر كەزىندە كەلمەدى» دەگەن پوليتسەيلەرگە قاتىستى تەكسەرۋ جۇرگىزىلەتىن بولدى.
«ادىرنا» ۇلتتىق پورتالى
