تۇركىستان وبلىسىندا كۇدىكتى ەر ادام ايەلىن كامەلەتكە تولماعان بالالارىنىڭ كوزىنشە ءولتىرىپ تاستادى. قازىر بالالارعا پسيحولوگيالىق كومەك كورسەتىلىپ جاتىر. ايماقتاعى پوليتسيا دەپارتامەنتى ءباسپاسوز قىزمەتىنىڭ مالىمەتىنشە، قىلمىستىق وقيعا 29 ءساۋىر كۇنى تۇنگى ساعات 02:45 شاماسىندا بولعان. وقيعا ورنىنا جەتكەن پوليتسيا قىزمەتكەرلەرى وتباسىلىق جانجال كەزىندە ايەل كۇيەۋىنىڭ سالعان دەنە جاراقاتتارىنان قايتىس بولعانىن انىقتاعان، دەپ جازادى "ادىرنا" ۇلتتىق پورتالى aikyn.kz-كە سىلتەمە جاساپ.
«اتالعان جايت ورداباسى اۋداندىق ىشكى ىستەر بولىمىندە قىلمىستىق كودەكستىڭ 99-بابى 1-بولىگى «كىسى ءولتىرۋ» بويىنشا تىركەلدى. الىنعان زاتتاي دالەلدەمەلەر ساراپتاماعا جولداندى. كۇدىكتى ءوزىنىڭ ارەكەتىن مويىنداپ، وكىنىشىن بىلدىرۋدە. قازىرگى تاڭدا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. تەرگەۋ بارىسىندا بولعان وقيعانىڭ بارلىق ءمان-جايى انىقتالاتىن بولادى. كۇدىكتى ەر ازامات قاماۋعا الىنعان» دەلىنگەن حابارلامادا.
سونىمەن قاتار، كۇدىكتى دەپ تانىلعان ورداباسى اۋدانىنىڭ تۇرعىنى پوليتسيا بولىمىندە ەشقانداي پروفيلاكتيكالىق ەسەپتە تۇرماعانى بەلگىلى بولدى. وسى كۇنگە دەيىن كورشىلەردەن نەمەسە تۋىستارىنان قانداي دا ءبىر وتباسىلىق جانجال تۋرالى ەشقانداي ارىز-شاعىم تۇسپەگەن.
اكىمدىك قىزمەتكەرلەرى مەن پوليتسيا ءبولىمىنىڭ باسشىلىعى جابىرلەنۋشىنىڭ تۋىستارىمەن كەزدەسىپ، ءتۇسىندىرۋ جۇمىستارىن جۇرگىزدى. ەرلى-زايىپتىلاردىڭ اتا-انالارى كامەلەتكە تولماعان ءتورت بالانى ءوز قامقورلىقتارىنا الاتىنىن ايتىپ وتىر. پوليتسيا مەن اكىمدىك تاراپىنان وتباسىنا بارلىق قاجەتتى كومەك كورسەتۋ شارالارى قاتاڭ باقىلاۋعا الىندى.
"ادىرنا" ۇلتتىق پورتالى
