مەملەكەت باسشىسى قاسىم-جومارت توقاەۆ قازاقستان حالقىن 1 مامىر – بىرلىك كۇنى مەرەكەسىمەن قۇتتىقتايدى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
"قىمباتتى وتانداستار! سىزدەردى قازاقستان حالقىنىڭ بىرلىگى مەرەكەسىمەن شىن جۇرەكتەن قۇتتىقتايمىن! مامىردىڭ وسى مامىراجاي مەرەكەسى – ەلىمىزدىڭ تۇتاستىعى مەن ىرىس-ىنتىماعىنىڭ سيمۆولى. دوستىق پەن ءوزارا تۇسىنىستىك داستۇرلەرى حالقىمىزدىڭ سانا-سەزىمىندە بەرىك ورنىققان. بۇل قاسيەتتەر بەرەكەلى ءومىردىڭ، بەيبىتشىلىك پەن كەلىسىمنىڭ وزەگى بولىپ وتىر. تاعدىردىڭ جازۋىمەن كەڭ بايتاق قازاق جەرىندە توعىسقان ءار الۋان مادەنيەتتەر تۇتاسا كەلە ۇلتتىق بىرەگەيلىگىمىزدىڭ اجىراماس بولىگىنە اينالدى. ءبىزدىڭ ماقساتىمىز ءبىر، قۇندىلىقتارىمىز ورتاق. مىزعىماس بىرلىكتىڭ ارقاسىندا قيىندىقتان قايمىقپاي، جاھاندىق سىن-قاتەردىڭ ءبارىن ەڭسەرىپ كەلەمىز. بۇگىندە جاڭا قازاقستاندى قۇرۋ باستاماسى بۇكىل قوعامدى ۇيىستىرۋدا. بۇل يدەيا ەل ازاماتتارىنىڭ جاسامپازدىق قۋاتىنان باستاۋ الادى. مەملەكەتىمىزدى جان-جاقتى جاڭعىرتۋعا ارقايسىمىز ءوز ۇلەسىمىزدى قوسۋىمىز كەرەك. بارشاڭىزعا زور دەنساۋلىق، تولاعاي تابىس تىلەيمىن! اسپانىمىز ءاردايىم اشىق بولسىن!", - دەلىنگەن پرەزيدەنت قۇتتىقتاۋىندا.
"ادىرنا" ۇلتتىق پورتالى
