تالدىقورعان قالاسىنداعى نازارباەۆ زياتكەرلىك مەكتەبىنىڭ قابىرعاسىندا “زامانداستار جىرلارى" جوباسى اياسىندا «ونەرىمدى ەلىمە ارنايمىن» ادەبي-شىعارماشىلىق كەش ءوتتى.
كەشتىڭ ماقساتى - ولكەمىزدەگى حالىقتىڭ ىستىق ىقىلاسىنا بولەنىپ جۇرگەن قالامگەرلەرىمىزدىڭ شىعارمالارىن وقۋعا ناسيحاتتاۋ، ولاردىڭ ۇلگىلى ءومىر جولدارىن وسكەلەڭ ۇرپاققا ونەگە تۇتىپ، جاستاردىڭ كىتاپ وقۋعا قۇلشىنىسىن ارتتىرۋ، ەلىنە، جەرىنە دەگەن سۇيىسپەنشىلىكتەرىن ارتتىرۋ. كەش قوناقتارى: قر مادەنيەت قايراتكەرى، قر اقپارات سالاسىنىڭ ۇزدىگى – جۇماتاي وسپانۇلى، قازاقستان جازۋشىلار وداعىنىڭ مۇشەلەرى – قاسەن گۇلباقىت توقتانقىزى مەن جانگەلدى نەمەرەباي، جۋرناليستەر جانە جازۋشىلار وداعىنىڭ مۇشەسى، حالىقارالىق قازاق پەن كلۋبىنىڭ مۇشەسى، «جەتىسۋ» تەلەاراناسىنىڭ ءبولىم باسشىسى، «Janr» جەتىسۋ ادەبي كلۋبىنىڭ پرەزيدەنتى – ەسبولات ايدابوسىن، رەسپۋبليكالىق، وبلىستىق ءمۇشايرالاردىڭ جەڭىمپازى، «كوڭىل گۇلى»، «العىس» اتتى ولەڭدەر جيناعىنىڭ اۆتورى – ازامات نۇرمۇحان سايلاۋۇلى، سونىمەن قاتار تالدىقورعان قالاسىنداعى نازارباەۆ زياتكەرلىك مەكتەبىنىڭ تۇلەگى، رەسپۋبليكالىق «جاس الاش» گازەتىندە پروزالىق شىعارمالارعا ارنالعان «قازاق پەن قالا» پروزا بايقاۋىنىڭ جەڭىمپازى – تەمىرلان قىلىشبەك.
كەزدەسۋ بارىسىندا زياتكەرلىك وقۋشىلار مەن كەش قوناقتارى بىرىگىپ ارنايى تاپسىرمالار ورىندادى: قىسقا ۋاقىت ارالىعىندا شىعارماشىلىق جۇمىس (پروزا/پوەزيا) جازدى. «اقىن ولەڭدەرى وقىرمان كوزىمەن» ايدارى بويىنشا وقۋشىلار قوناقتاردىڭ شىعارمالارىنىڭ بىرىنە الدىن-الا سالىنعان سۋرەتتەردى، گازەت-جۋرنال قيىندىلارىنان جاسالىنعان پوستەرلەردى تانىستىردى. قوناقتار سۋرەت ارقىلى ءوزىنىڭ قاي شىعارماسىمەن بايلانىستى ەكەنىن انىقتاپ، سول شىعارمانىڭ شىعۋ تاريحىمەن ءبولىستى. سونداي-اق، اقىن-جازۋشىلار شىعارماشىلىق لابوراتورياسى جونىندە وقۋشىلارعا سۇحبات بەردى.
وسكەلەڭ ۇرپاق ادەبيەتتەن الشاقتاماسا، ول ۇلتتان الشاقتامايدى. ۇلتتان الشاقتاماعان ادام، ول كەيىن ۇلتتىڭ قايراتكەرى بولادى، حالىققا قىزمەت ەتەدى. قازىرگى تاڭدا مىقتى بىلگىرلەر بار، بىراق ءوزىنىڭ ءتول مادەنيەتىنەن الشاقتاپ كەتكەن. سونداي ماسەلەنى الدىن الۋ – بۇگىنگى زياتكەر مەكتەپ ۇيىمداستىرىپ وتىرعان وسىنداي ءىس شارا، - دەپ «جەتىسۋ» تەلەاراناسىنىڭ ءبولىم باسشىسى، «Janr» جەتىسۋ ادەبي كلۋبىنىڭ پرەزيدەنتى، جازۋشى، جۋرناليست ەسبولات ايدابوسىن ءوز پىكىرىمەن ءبولىستى.
