قورعانىس مينيسترلىگى ەڭبەك ديناستيالارىن قۇرۋ ءۇشىن جاستاردى كاسىپورىندارعا تارتىپ، ولاردىڭ پراكتيكالىق ءبىلىمىن جەتىلدىرۋدى باسىم باعىتقا قويىپ وتىر.
بۇل تۋرالى بۇگىن قورعانىس جانە اەروعارىش ونەركاسىبى كەشەنى ءمينيسترى بەيبىت اتامقۇلوۆ ماجىلىستە وتكەن ۇكىمەت ساعاتىندا مالىمدەدى، دەپ حابارلايدى Sputnik.
“بۇگىندە وتاندىق قورعانىس ونەركاسىبى كەشەنى ەلەكتروندى، اقپاراتتىق، عارىش تەحنولوگيالارىن بىرىكتىرەدى. تاياۋ ارادا ءبىز ەكونوميكانىڭ عىلىمدى قاجەت ەتەتىن ونەركاسىپ سەكتورلارىنىڭ بىرىنە اينالا الامىز. ءبىزدىڭ الاڭداردا جاڭا تەحنولوگيالىق يننوۆاتسيالىق شەشىمدەر سىناقتان وتكىزىلەدى. ءبىز قازىر بۇل باعىتتا جۇمىس ىستەپ جاتىرمىز”، — دەدى مينيستر.
اتامقۇلوۆ قورعانىس ونەركاسىبىنىڭ دامۋى سول سالادا ىستەيتىن جۇمىسشىلاردىڭ ءبىلىمى مەن بىلىكتىلىگىنە بايلانىستى ەكەنىن اتاپ ءوتتى.
“جاستاردى وقىتۋ، كاسىپورىنداردا كاسىبي كادرلار دايارلاۋ، جوعارى تەحنولوگيالىق سالانىڭ تىرەگىنە اينالاتىن ەڭبەك ديناستيالارىن قۇرۋ – ءبىزدىڭ باسىم باعىتتارىمىزدىڭ ءبىرى. ءبىز تالداۋ جاسادىق، قازىر تالىمگەرلىكككە ورالىپ جاتىرمىز. تالىمگەرلەردى ىنتالاندىرىپ، قورعانىس ونەركاسىبى كەشەنىندە كادرلىق الەۋەتتى ساقتاۋ ءۇشىن بارىمىزدى سالۋدامىز”، — دەدى ۆەدومستۆو باسشىسى.
ءمينيستردىڭ ايتۋىنشا، قيىن-قىستاۋ جىلدارى قازاقستان كوپتەگەن بىلىكتى مامانىنان ايىرىلدى.
“وكىنىشكە قاراي، قيىن-قىستاۋ جىلدارى ءبىز كوپ اقىلدى ادامدى جوعالتتىق: جەر اۋداردىق، زەينەتكە شىقتى، ءسويتىپ ارتىنان ەرگەن جاستارمەن تاجىريبەسىمەن بولىسە المادى. كاسىپورىندارعا پايدانى عانا كوزدەگەن، تەز بايىپ شىعۋدى ويلاعان مەنەدجەرلەر كەلگەن ۋاقىت دا بولدى. دەسەك تە، ەلىن سۇيگەن ۇزدىك پاتريوت كادرلار قالدى. ولار قيىندىققا ءتوزىپ، بارىنە شىداپ، بۇگىندە سولاردىڭ ارقاسىندا كاسىپورىندارىمىز جۇمىس ىستەپ تۇر”، — دەپ تۇيىندەدى ءسوزىن اتامقۇلوۆ.
__________________________________________________________________________________________________________ stan.kz
