قۇلسارى قالاسىندا اۋدان اكىمدىگى عيماراتىنىڭ الدىندا «تشو» جشس مەن جەرگىلىكتى بيلىك وكىلدەرىنە تالاپتار قويىلعان بەيبىت ميتينگ ءوتتى، دەپ حابارلايدى “ادىرنا” ۇلتتىق پورتالى اق جايىق پورتالىنا سىلتەمە جاساپ.
بەلسەندىلەر اۋداندىق اكىمدىككە الدىن الا ءوتىنىش بەرىپ، 500-گە جۋىق ادامنىڭ قاتىسۋىنا جانە ۇزاقتىعى 2 ساعاتقا دەيىن ميتينگ وتكىزۋگە رۇقسات العان. تاڭەرتەڭنەن اكىمدىكتىڭ عيماراتى قاسىندا «جەدەل جاردەم»، ءورت ءسوندىرۋ كولىكتەرى تۇردى. پوليتسيا جاعدايدى سىرتتاي باقىلاۋعا الدى.
ميتينگ تاڭەرتەڭگى ساعات 10.00-گە بەلگىلەندى. ادامدار الاڭعا 9.00-دەن باستاپ جينالا باستادى. ۇيىمداستىرۋشىلار كەلۋشىلەرگە «بايتاق بولاشاق» ەمبلەماسى مەن جاسىل ءتۇستى لەنتانى، سونىمەن بىرگە ءتارتىپ ساقتاۋ جونىندە ەسكەرتپە پاراقشالارىن تاراتتى. «مۇنايدىڭ يەسى حالىق»، «الەم نازارىڭدى جىلىويعا اۋدار»، «تشو جىلىوي حالقىن ۋلاما. تشو تابيعاتتى ايالا»، «ۇرپاققا تازا اۋا. جارقىن بولاشاق»، ت.ب. پلاكاتتار كوتەرىپ شىقتى.
ايتا كەتۋ كەرەك، بۇعان دەيىن اۋداندا ەكولوگيالىق زارداپتى جويۋ، حالىققا الەۋمەتتىك-ەكونوميكالىق قولداۋ كورسەتۋدى تالاپ ەتكەن ەكى جيىن وتكىزىلدى.
ەكىنشى جيىندا «تشو» جشس باس ديرەكتورى كەۆين لايون قاتىسىپ، جينالعاداردىڭ مۇڭ-مۇقتاجىن تىڭداپ، «يگىلىك» باعدارلاماسى نەگىزىندە جاسالعان جۇمىستارعا توقتالدى.وسىدان كەيىن جەرگىلىكتى بەلسەندىلەردىڭ پىكىرى ەكىگە جارىلدى. اۋداندىق ءماسليحاتتىڭ دەپۋتاتتارى مەن كەيبىر بەلسەندىلەر بەيبىت ميتينگتىڭ قاجەت ەمەستىگىن، وعان قاتىسپاۋعا شاقىرىپ، الەۋمەتتىك جەلىدە بىرنەشە ۆيدەوۇندەۋ جولدادى. سوعان قاراماستان الاڭعا كوپ ادام جينالدى.
“مەن العاش قۇلسارىعا كەلگەندە اۋاسىنان باسىم اۋىرىپ، ءجايسىز سەزىندىم. بۇل جەردە ەكولوگيالىق احۋال ناشار، مۇنى ءبىز تىكەلەي تشو قىزمەتىمەن بايلانىستىرامىز. بۇدان باسقا، وسى جەردەن مۇنايىمىزدى ءوندىرىپ جاتقاندار جىلىوي اۋدانىنىڭ الەۋمەتتىك-ەكونوميكالىق ماسەلەلەرىن شەشۋگە كوبىرەك قارجى سالۋى كەرەك دەپ ەسەپتەيمىز. ءبىز بۇگىنگى جيىندا ايتىلعان ۇسىنىستار مەن تالاپتاردى پرەزيدەنت توقاەۆقا جولدايمىز”، - دەدى “بايتاق بولاشاق” ەكولوگيالىق اليانس توراعاسى ازاماتحان ءامىرتاي.
جەرگىلىكتى تۇرعىندار دا جۇمىس جوق ەكەنىن، بولعان كۇننىڭ وزىندە جالاقسى ماردىمسىز ەكەنىن ايتادى.
بىزدە جۇمىسسىزدار كوپ، تشو جەرگىلىكتى ادامداردى جۇمىسقا المايدى. جۇمىسقا السا دا جالاقىسى شەتەلدىكتەن اناعۇرلىم از. تشو ءبىرىنشى كەزەكتە جەرگىلىكتى تۇرعىنداردى جۇمىسقا الۋى ءتيىس. اۋداندا مەديتسينا دامىماي قالعان، دارىگەرلەر جەتىسپەيدى، زامانۋي ۇلگىدەگى جابدىقتار جوق. باسپانا، جول، كوگالداندىرۋ ماسەلەلەرى اقساپ جاتىر. مۇناي بايلىعىنىڭ قىزىعىن قاراپايىم حالىق كورىپ وتىرعان جوق”، – دەيدى دايراباي ەلدەسباەۆ، رايسا تەلەۋعاليەۆا جانە ت. ب.
ەكى ساعاتقا سوزىلعان ميتينگ سوڭىندا بەلسەندىلەر تشو كەڭسەسىن اۋدان ورتالىعىنا كوشىرۋ، اۋداننىڭ 2023-2033 جىلدارعا ارنالعان ەكونوميكالىق-الەۋمەتتىك باعدارلاماسىن جاساقتاۋ تالابىمەن قازاقستان پرەزيدەنتى ق.توقاەۆقا شىعۋدى ۇيعاردى.
”ادىرنا” ۇلتتىق پورتالى
