ەلىمىزدەگى ادام قۇقىعى مەن سوت ادىلدىگىنە كۇمان كەلتىرۋشىلەر وتە كوپ جانە ونى نەگىزسىز دەۋگە دە بولماس. ءتىپتى «قاسىرەتتى قاڭتار» وقيعاسىندا رۇقسات ەتىلمەگەن ادىسپەن ۇستالعانداردان جاۋاپ الۋ، ولاردى قيناۋ ادىستەرى قولدانىلعانى جايلى رەسمي بيلىك مويىنداپ، بۇگىندە بىرنەشە قۇقىق قورعاۋ ورگان وكىلدەرىنىڭ تۇتقىندالعانى راس. «ادىرنا» ۇلتتىق پورتالىنا كۇندەلىكتى ادىلدىك ىزدەپ، اقپاراتتىق قولداۋ سۇرايتىن جانداردىڭ حاتتارى مەن وتىنىشتەرى كەلىپ تۇرادى. سونىڭ ءبىرىن نازارلارىڭىزعا ۇسىنامىز.
2020 جىلى ورال قالاسىندا اقشا ايىرباستاۋ پۋنكتىنە شابۋىل جاسالدى. ارتىنشا قىلمىسقا قاتىسى بار دەگەن ەكى ازامات ۇستالدى. ولار قۇتجانوۆ پەن حاسەنوۆ ەسىمدى ازاماتتار بولاتىن. ولار قىلمىس جاساعانىن بىردەن مويىندايدى. الايدا كەيىننەن بەلگىلى بولعانداي، قورعاۋشىلارى ولارعا قاتىستى رۇقسات ەتىلمەگەن تەرگەۋ ادىستەرى، ۇرىپ-سوعۋ مەن قيناۋ تاسىلدەرى قولدانىلعانىن ايتادى. مىسالى حاسەنوۆتى قاقاعان ايازدا جۇقا كيىممەن سىرتقا تۇرعىزىپ، دارەتحاناعا بارۋعا رۇقسات ەتپەگەن دەگەن سۇمدىقتى قورعاۋشىلارى ايتتى. سول سىندى قۇتجانوۆقا دا قىسىم كورسەتكەن. مىنە، وسى قىسىم كورسەتۋ بارىسىندا تاعى ءبىر «كىنالى» تابىلعان. ول بايانوۆ دارحان ەسىمدى جىگىت. «ونىڭ بۇل قىلمىسقا قاتىسى بار» دەگەن مويىنداۋدى الۋ قۇقىق قورعاۋ ورگاندارىنا توپتىق قىلمىس (وپگ) بابىن اشۋ ءۇشىن كەرەك بولعان دەيدى قورعاۋشىلار. ءۇش ادام بولسا، وندا بەرىلەتىن جازا دا ارتا تۇسەدى. سوندىقتان ەش كىناسى جوق، قىلمىسقا تۇك قاتىسى بولماعان دارحان بايانوۆتى ىسكە قوسىپ جىبەرگەنىن دارحاننىڭ اكەسى مالىمدەپ، پرەزيدەنت توقاەۆقا ارنايى بەينەۇندەۋ دە جاريالادى.
دارحان بايانوۆتىڭ قىلمىسقا قاتىسى بارىنا ناقتى بىردە ءبىر دالەل جوق. تەك قانا حاسەنوۆ پەن قۇتجانوۆتىڭ مويىنداۋى عانا بار. الايدا ول مويىنداۋدىڭ دا قانداي جولمەن كەلگەنى بەلگىلى دەيدى قورعاۋشىلار. حاسەنوۆتىڭ دەنساۋلىعىنا زاقىم كەلگەن، ول ايازدا ۇزاق تۇرۋىنان بولسا كەرەك. قۇتجانوۆتىڭ دا ءبىرىنشى بايلىعى سىر بەرگەن. ولارعا قاتىستى پروكۋرورعا ارنايى تەكسەرۋ جۇرگىزۋ تاپسىرىلسا دا، ءىستى جەڭىل-جەلپى قاراپ، جىلى جاۋىپ قويعان. ال بايانوۆقا تاعىلعان نەگىزسىز ايىپ وتە اۋىر. «ادام ۇرلاۋ»، «توناۋ» جانە «شابۋىل جاساۋ». مىنە، وسى باپتارمەن ول 9 جىلعا سوتتالىپ كەتتى. حاسەنوۆ پەن قۇتجانوۆ بولسا 8 جىلعا سوتتالعان. اكەسى بالاسىنىڭ كىناسىز ەكەنىن ايتادى، ءتىپتى ونىڭ قىلمىس بولعان ساتتە قالادا ەمەس، ورالدان 130 شاقىرىم جەردەگى اقسايدان ورالعا كەلە جاتقانى بيللينگ ارقىلى دالەلدەنگەن. بايانوۆقا قاتىستى بىردە ءبىر بەينەتۇسىرىلىم، كۋاگەرلەردىڭ جاۋابى، ونى تانىعان بىردە ءبىر كۋاگەر جوق. قورعاۋشىلار ءتىپتى قۇجاتتارداعى قولداردى دا قولدان جاساپ، وزگەرتكەنىن ايتادى. الايدا سوعان قاراماستار سوت وسىنداي ايىپتاۋ شەشىمىن شىعارعان.
بايانوۆتىڭ جاقىندارى مەن قورعاۋشىسى ەل پرەزيدەنتىنەن اراشا سۇراپ، ءىستىڭ ءادىل شەشىلۋىن وتىنەدى. اكەسى بەينەۇندەۋدى قوبالجىپ جازعانىن ايتادى. بۇگىندە ۇلىن الاڭداعان اكەسىنىڭ دەنساۋلىعى دا سىر بەرگەن.
«ادىرنا» ۇلتتىق پورتالى
