قازاقستان رەسەيلىك «سبەر» كومپانيالار توبىمەن مەملەكەتتىك قىزمەتتەردى كورسەتۋدىڭ جاڭا تسيفرلىق پلاتفورماسىن ەنگىزۋ تۋرالى كەلىسىمنەن باس تارتتى جانە پلاتفورمانى ءوز كۇشىمەن ازىرلەۋدى جوسپارلاپ وتىر. بۇل تۋرالى تسيفرلىق دامۋ جانە اەروعارىش ونەركاسىبى ۆيتسە-ءمينيسترى اسقار جامباقين ايتتى، دەپ حابارلايدى “ادىرنا” ۇلتتىق پورتالى.
«قازىر گەوساياسي جاعدايعا جانە ءوز مۇمكىندىكتەرىمىزدى قايتا قاراستىرۋعا بايلانىستى «ۇات» اق-پەن قازاقستاندىق IT-كومپانيالاردى تارتا وتىرىپ، ءوز كۇشىمىزبەن پلاتفورما جاساۋ تۋرالى شەشىم قابىلداندى. تەحنيكالىق-ەكونوميكالىق نەگىزدەمە جۇمىستارى جۇرگىزىلىپ جاتىر. بيىل جىلدىڭ اياعىنا دەيىن جاڭا پلاتفورمانىڭ العاشقى قىزمەتتەرى ازىرلەنىپ، قولدانىلا باستايدى»، — دەدى جامباقين وقك-دا وتكەن بريفينگتە جۋرناليستەر سۇراعىنا جاۋاپ بەرىپ.
ايتۋىنشا، جاڭا پلاتفورمانى تولىق ازىرلەۋ جانە ەنگىزۋ شامامەن 2-3 جىلعا سوزىلادى.
ەسكە سالايىق، بۇعان دەيىن تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستاندا مەملەكەتتىك قىزمەتتەردى كورسەتۋدىڭ جاڭا تسيفرلىق پلاتفورماسىن ەنگىزۋ جوسپارلانعانىن ءتۇسىندىرىپ وتكەن بولاتىن.
كەيىن قازاقستان ۇكىمەتى مەن «سبەربانك روسسي» قول قويعان تسيفرلىق ترانسفورماتسيا جونىندەگى جوبالار سالاسىنداعى ىنتىماقتاستىق تۋرالى مەموراندۋمنىڭ جاعدايى بەلگىلى بولدى.
”ادىرنا” ۇلتتىق پورتالى
