جەكە تۇرعىن ءۇي قۇرىلىسىنا جەر ۋچاسكەسىن الۋ ءۇشىن egov.kz ارقىلى كەزەككە تۇرۋعا بولادى، دەپ حابارلايدى “ادىرنا” ۇلتتىق پورتالى Zakon.kz سايتىنا سىلتەمە جاساپ.
قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قر اۋىل شارۋاشىلىعى مينيسترلىگىمەن بىرلەسىپ، جتق-عا جەر ۋچاسكەسىن الۋعا كەزەككە قويۋ پروتسەسىن اۆتوماتتاندىرۋ ماسەلەسىن پىسىقتادى.
بۇعان دەيىن جەكە تۇرعىن ءۇي قۇرىلىسىنا جەر ۋچاسكەسىن الۋ كەزەگىنە تۇرۋ ءۇشىن قازاقستاندىقتار اكىمدىكتەرگە قاعاز جۇزىندە ءوتىنىش تاپسىراتىن، وندا كەزەك رەتىنىڭ دۇرىس جۇرگىزىلمەۋ قاۋىپى بار ەدى. ول كەزدە كەزەككە تۇرۋ پروتسەسى 12 كۇن ۋاقىت الاتىن ەدى. بۇل وتىنىشتەر 16 جىل بويى اۋدان، قالا، وبلىس دەڭگەيىندە بولەك-بولەك ساقتالدى.
جاڭا جۇيەنىڭ ارقاسىندا قازاقستاندىقتار كەزەككە تۇرىپ، eGov.kz-تە ونىڭ جىلجۋ بارىسىن ءوز بەتىنشە باقىلاپ، جەر كەزەگىنە بۇدان بۇرىن بەرىلگەن ءوتىنىشتىڭ دەرەكتەرىن وزەكتەندىرە الادى. وسىلايشا، ءاربىر قازاقستاندىق الۋى ءتيىس 10 سوتىق جەردى الۋ پروتسەسى بارىنشا اشىق بولادى. ال اۆتوماتيزاتسيا ارقاسىندا بۇل پروتسەسكە 5 مينۋت قانا جۇمسالادى.
اكىمدىكتەر بەرگەن ءتىزىمدى ءبىز تسيفرلاندىرىپ، ەلەكتروندى فورماتقا اۋىستىردىق. جەر تەلىمىنە كەزەكتى تسيفرلاندىرۋ – سىبايلاس جەمقورلىقتى جويۋ جانە جەردى يگەرۋ ۇدەرىسىندە جاسالعان ۇلكەن ىلگەرى قادام. ەندى كامەلەت جاسىنا تولعان ءاربىر قازاقستاندىق ۇيدەن شىقپاي-اق، 10 سوتىق جەرگە eGov.kz ارقىلى ءوتىنىم بەرە الادى. تاعى ءبىر جاڭاشىلدىق – ەندى تاڭداعان ايماقتىڭ اكىمدىگىنە بارماي-اق، ەلىمىزدىڭ كەز كەلگەن وڭىرىنەن جەر تەلىمىنە ءوتىنىم بەرۋگە بولادى، – دەپ ءتۇسىندىردى قر تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ.
قىزمەتتى پايدالانۋ ءۇشىن eGov.kz پورتالىنا كىرىپ، «جىلجىمايتىن مۇلىك» – «جەر قاتىناستارى» بولىمىنەن «جەكە تۇرعىن ءۇي قۇرىلىسىنا جەر ۋچاسكەسىن (10 سوتىق جەر) الۋعا كەزەكتى قاراۋ نەمەسە كەزەككە تۇرۋ» قىزمەتىن تاڭداۋ قاجەت.
ءارى قاراي ءوتىنىش ءتۇرىن تاڭداۋ كەرەك. بۇگىندە پورتالدا ءوتىنىشتىڭ ءۇش ءتۇرى بار:
- كەزەككە قويۋ;
- دەرەكتەردى وزەكتەندىرۋ;
- كەزەكتەن شىعارۋ.
ەگەر ءسىز جەر ۋچاسكەسىن الۋ ءۇشىن كەزەككە العاش رەت ءوتىنىش ءبىلدىرىپ تۇرساڭىز، وندا ءوزىڭىز جەر الۋدى قالايتىن ايماقتى تاڭدايسىز.
ەگەر ءسىز بۇدان بۇرىن جەر كەزەگىنە تۇرعان بولساڭىز، بىراق ول تۋرالى اقپارات تاپپاساڭىز، وندا «وزەكتەندىرۋ» ءوتىنىش ءتۇرىن تاڭداۋىڭىز قاجەت.
كەزەك العانىڭىزدى راستاۋ ءۇشىن قولىڭىزدا بار قۇجاتتى (تالوننىڭ سكان-نۇسقاسى، ءوتىنىشتىڭ، جەكە كۋالىكتىڭ جانە ت.ب. كوشىرمەلەرى) جۇكتەۋ قاجەت. سونداي-اق كەزەك رەتىن www.map.gov4c.kz/egkn/ سايتىندا ەتسق ارقىلى اۆتوريزاتسيادان ءوتىپ، باقىلاپ وتىرۋعا بولادى.
بۇدان بۇرىن العان جەر كەزەگىنەن باس تارتۋ ءۇشىن «شىعارۋ» ءوتىنىش ءتۇرىن تاڭداۋ قاجەت.
ەگەر ازامات بۇدان بۇرىن مەملەكەتتەن تەگىن جەر تەلىمىن العان بولسا نەمەسە ەلدىمەكەندە جتق ءۇشىن بوس جەر تەلىمى بولماسا، جەر كەزەگىنە ءوتىنىش بەرە المايدى. بوس ۋچاسكەلەردى بەرۋ جونىندەگى شەشىمدى اكىمدىكتەر قابىلدايدى. ۋچاسكەلەر الاڭداردىڭ دايىن بولۋىنا قاراي نەمەسە ەلدىمەكەننىڭ باس جوسپارىنا سايكەس، بوس اۋماقتار بولعان جاعدايدا بەرىلەدى.
ەگەر بۇرىن ءبىر وڭىردە جەر تەلىمىنە كەزەككە تۇرعان بولساڭىز، ال قازىر وزگە ايماقتان جەر الۋعا نيەتتەنسەڭىز، 10 سوتىققا كەزەك رەتى ەرتەرەك كەلگەن وڭىردەن جەر ءبىر رەت قانا بەرىلەتىنىن، قالعان وتىنىشتەردىڭ كۇشى جويىلاتىنىن ەسكەرۋ قاجەت.
”ادىرنا” ۇلتتىق پورتالى
