قازاقستاندىق بەلگىلى شاحماتشى ءبيبىسارا اساۋباەۆا گيننەستىڭ رەكوردتار كىتابىنا ەندى، دەپ حابارلايدى “ادىرنا” ۇلتتىق پورتالى سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
«قازاقستاندىق شاحماتشى ءبيبىسارا اساۋباەۆا گيننەستىڭ رەكوردتار كىتابىنا ەندى. ەڭ جاس الەم چەمپيونى اتانعان ءبيبىسارا 17 جاسىندا وسى ۇيىمنىڭ ارنايى سەرتيفيكاتىنا يە بولدى» دەلىنگەن قر مادەنيەت جانە سپورت مينيسترلىگىنىڭ ءباسپاسوز قىزمەتى حابارلاماسىندا.
ۇيىمنىڭ رەسمي قۇجاتىندا «ايەلدەر اراسىندا بليتس بويىنشا ەڭ جاس الەم چەمپيونى قازاقستاندىق ءبيبىسارا اساۋباەۆا 2004 جىلى 26 اقپاندا دۇنيەگە كەلگەن» جانە «2021 جىلى ۆارشاۆادا (پولشا، 2021 جىل 30 جەلتوقسان) وتكەن بليتس بويىنشا الەم چەمپيوناتىندا 17 جاس 307 كۇندە جەڭىسكە جەتتى» -دەلىنگەن.
ودان كەيىن اسساۋباەۆا «بليتس» بويىنشا ءبىرىنشى ورىن الىپ، ايەلدەر اراسىندا الەمدىك شاحمات تاريحىنداعى ەڭ جاس شاحماتشى اتاندى.
سونداي-اق، وسى چەمپيوناتتا ءبيبىسارا جىلدام شاحماتتان (راپيد) 2 ورىنعا يە بولدى. شەشۋشى ويىنداردا ءبيبىسارا تاجىريبەلى گرۋزين شاحماتشىسى، گروسسمەيستەر نانا دزاگنيدزەنى، جەرلەسى اسەل سەرىكبايدى جەڭىپ، حالىقارالىق چەمپيوناتتىڭ جەڭىمپازى گروسسمەيستەر الەكساندرا كوستەنيۋكپەن تەڭ ءتۇستى.
“ادىرنا” ۇلتتىق پورتالى
