بەلگىلى مانەرلەپ سىرعاناۋشى دەنيس تەننىڭ ولىمىنە بايلانىستى دەپ سوتتالعان جانار تولىباەۆا بوستاندىققا شىقتى، دەپ حابارلايدى “ادىرنا” ۇلتتىق پورتالى ءىىم قىلمىستىق-اتقارۋ جۇيەسى كوميتەتىنىڭ ءباسپاسوز قىزمەتىنە سىلتەمە جاساپ.
تولىباەۆا 2021 جىلدىڭ جەلتوقسانىندا قاج مەكەمەسىنەن شىعارىلعان. ول 2019 جىلى قىلمىس تۋرالى حابارلاماعانى ءۇشىن 4 جىلعا باس بوستاندىعىنان ايىرىلدى. كولونيادا ءجۇرىپ، بالاسىن دۇنيەگە اكەلدى.
قايعىلى وقيعا 2018 جىلدىڭ 19 شىلدەسىندە الماتىدا بولعان. دەنيس كافەدەن شىعىپ، كولىگىنىڭ اينالارىن ەكى جىگىتتىڭ ۇرلاپ جاتقانىن كورەدى. قاشا جونەلگەن ولاردى قۋىپ جەتكەن سپورتشىعا ءبىر ۇرى جامباسىنان پىشاق سالادى. ناتيجەسىندە ارتەريا زاقىمدالىپ، قان قوپ كەتەدى. كەيىن اۋرۋحانادا كوز جۇمدى.
سوت 2019 جىلدىڭ باسىندا سپورتشىنىڭ ولىمىنە قاتىستى سوتتالعاندارعا ۇكىم شىعاردى.
ارمان قۇدايبەرگەنوۆ "ۇرلىق", "قاراقشىلىق" جانە "ادام ءولتىرۋ" بويىنشا ايىپتى دەپ تانىلىپ، 18 جىلعا سوتتالدى. نۇرالى قياسوۆقا "ادام ءولتىرۋ" جانە "قاراقشىلىق" باپتارى بويىنشا 18 جىلعا باس بوستاندىعىنان ايىرۋ جازاسى كەسىلدى.
جانار تولىباەۆا "قىلمىس تۋرالى حابارلاماۋ" بويىنشا كىنالى دەپ تانىلدى. ول 4 جىلعا باس بوستاندىعىنان ايىرىلدى. ءىس بارىسىندا ونىڭ جۇكتى ەكەنى بەلگىلى بولدى. ول ەكىنشى بالاسىن تۇرمەدە بوساندى. ول جازاسىن بالاسىمەن بىرگە الماتى وبلىسى جاۋعاشتى اۋىلىنداعى لا-155/4 تۇزەتۋ مەكەمەسىندە وتەدى.
تولىباەۆا بالاسىن بوسانعاننان كەيىن ءبىر جىلدان استام ۋاقىت بوستاندىقتا بولعان، الايدا كولونيانىڭ سوت القاسىنىڭ ۋاقىتىندا مارقۇمنىڭ تۋىستارىنا سوتتالۋشىنىڭ سوتقا ءوتىنىش تۇسىرگەنى تۋرالى ەشقانداي ەسكەرتۋ جىبەرمەگەندىكتەن قايتا توعىتىلعان.
"زاڭ بويىنشا اۋىر قىلمىس كەزىندە جازانىڭ ۇشتەن ءبىر بولىگىن وتەپ، شىعۋعا بولادى. ەگەر ەشقانداي زاڭبۇزۋشىلىق بولماسا، تۇرمە ىشىندەگى ءتارتىپ جاقسى بولسا، جازانى جەڭىلدەتەدى. وسى مەرزىمدى وتەگەننەن كەيىن سوتقا ارىز جازدىم. بالامەن بۇل جەردە وتىرعان ماعان دا وڭاي ەمەس. سوت شەشىمىمەن مەنىڭ جازام 73-باپ بويىنشا باس بوستاندىعىن شەكتەۋگە اۋىستىرىلدى. بىراق 1 جىل 3 ايدان كەيىن قايتادان وسى جەرگە، جالپى كولونياعا ورالىپ وتىرمىن", - دەگەن ەدى تولىباەۆا Sputnik قازاقستانعا بەرگەن سۇحباتىندا.
“ادىرنا” ۇلتتىق پورتالى
