ارقالىق جانە تورعاي ءوڭىرىنىڭ دامۋىنا بايلانىستى ارنايى كەشەندى جوسپار قابىلدانۋى قاجەت!
مەملەكەت باسشىسى قاسىم-جومارت توقاەۆ ءوزىنىڭ «جاڭا قازاقستان: جاڭارۋ مەن جاڭعىرۋ جولى» اتتى جولداۋىندا اباي، جەتىسۋ جانە ۇلىتاۋ وبلىستارىن قۇرۋ تۋرالى ۇسىنىسىن حالىق زور ىقىلاسپەن قابىل الدى.
وسى ورايدا، 90-شى جىلدارى وبلىس مارتەبەسىنەن ايىرىلعان تورعاي ءوڭىرى دە ەسكەرۋسىز قالماۋى كەرەك.
وسىعان بايلانىستى - ەلدىڭ كوتەرىپ جۇرگەن، شەشىمىن تاپپاعان تۇيتكىلدى ماسەلەلەر از ەمەس.
ارينە، وڭىردە اتقارىلىپ جاتقان جۇمىستار بارشىلىق، دەگەنمەن دە ايماقتىڭ ينفراقۇرىلىمى توزىپ، تۇرعىندار سانىنىڭ ازايىپ، تۇرمىس دەڭگەيى تومەندەپ كەتكەنى جاسىرىن ەمەس.
وكىنىشكە وراي، بۇگىندە ستراتەگيالىق ماڭىزى زور بولا تۇرا، تورعاي ايماعىنىڭ دامۋى كەنجەلەپ قالىپ وتىر.
ءوڭىردىڭ جالپى مەملەكەتىمىزدىڭ دامۋىندا - استىقپەن، مال شارۋاشىلىعىمەن، بولاشاق پايدالى قازبالارىمەن قوساتىن الەۋەتى ۇلكەن.
سوندىقتان، قاسيەتتى تورعاي ءوڭىرىنىڭ ەكونوميكالىق-الەۋمەتتىك احۋالىنا قاتىستى ماسەلەلەرگە قىسقاشا توقتالىپ وتكىم كەلەدى.
بىرىنشىدەن، كولىكتىك-لوگيستيكالىق ينفراقۇرىلىمدى دامىتۋدىڭ ارقالىق-تورعاي ءوڭىرى ءۇشىن ەرەكشە ماڭىزى بار.
ماسەلەن، دەرجاۆينسك-ارقالىق رەسپۋبليكالىق تاس جولىنىڭ بولىگى كۇردەلى جوندەۋ جۇرگىزۋدى تالاپ ەتەدى.
ال، رەسپۋبليكالىق ۇلىتاۋ-ارقالىق اۆتوموبيل جولىن قايتا جاڭارتۋ - ءوڭىر حالقى ءۇشىن ۇلكەن الەۋمەتتىك-ەكونوميكالىق ماڭىزى بار. ەرتەڭگى بيۋدجەتتى ناقتىلاۋ كەزىندە جوبالىق-سمەتالىق قۇجاتتارعا بيىل دايىنداۋعا قارجى ءبولۋدى سۇرايمىز.
بۇعان قوسا، ارقالىق-تورعاي-ىرعىز ارقىلى وتەتىن «ورتالىق-باتىس» اۆتوموبيل جول جوباسى جۇزەگە اسسا - ءوڭىر ءۇشىن ۇلكەن دامۋ مۇمكىندىگىن بەرەتىن ەدى. قازىردىڭ وزىندە، سول كوپ قاراجاتى قاجەت ەتەتىن اۆتوبان ماسەلەسى شەشىلگەنشە تورعاي مەن ىرعىز اراسىنداعى 70 شاقىرىم جولدى قوسۋ جوباسى قولعا الىنسا.
ەكىنشىدەن، ارقالىقتاعى بوكسيت ءوندىرىسى جابىلىپ، بيۋدجەتتىك تابىس كوزى ازايۋدا. وڭىردەگى كاسىپورىنداردىڭ جالاقى دەڭگەيى تومەن. ماماندار جەتكىلىكسىز. ماسەلەن، ءوڭىردى ەلەكتر ەنەرگياسىمەن قامتاماسىز ەتەتىن 500-گە جۋىق جۇمىسكەرى بار «قوستانايۋجەلەكتروسەرۆيس» مەكەمەسىندە جالاقىنىڭ ورتاشا مولشەرى 89,0 مىڭ تەڭگەنى قۇرايدى. سونداي-اق، جاڭا ايتىلعان اتەك («اركالىكسكايا تەپلوەنەرگەتيچەسكايا كومپانيا») مەكەمەسىنىڭ دە جالاقىنى كوتەرۋگە مۇمكىندىگى جوق. كوپتەگەن ماماندار جۇمىستان شىعىپ جاتىر.
ۇشىنشىدەن، ارقالىق قالاسىندا 10 جىلعا جۋىق ورتالىق مادەنيەت سارايى سپورت كەشەنىمەن قوسا جابىق تۇر، جىل سايىن جوندەۋگە سۇراعان قاراجات بولىنبەيدى. جەرگىلىكتى جەردىڭ بيۋدجەتى جەتپەسە، رەسپۋبليكالىق بيۋدجەتتەن قاراجات ءبولۋدى سۇرايمىز.
تورتىنشىدەن، ارقالىقتىڭ ەكى گيمنازياسى ستاندارتقا ساي كەلمەيتىن عيماراتتا وتىر. بۇرىڭعى اكىمشىلىك عيماراتىندا وقىپ، وقۋشىلاردىڭ سپورتپەن اينالىساتىن مۇمكىنشىلىگى جوق. مەملەكەت باسشىسىنىڭ مىڭ مەكتەپ سوعۋ تاپسىرماسىنا ساي، ارقالىقتا جاڭا مەكتەپ سوعۋدى سۇرايمىن.
بەسىنشىدەن، مەنىڭ كوتەرىپ وتىرعانىم - تورعاي حالقىن مازالايتىن كەلەلى ماسەلەلەردىن شەتى عانا. ءوڭىر مەملەكەتتىڭ ەرەكشە قامقورلىعىنا ءزارۋ. وسىعان بايلانىستى «ارقالىق جانە تورعاي ءوڭىرىنىڭ دامۋىنا بايلانىستى ارنايى كەشەندى جوسپار» قابىلداۋ قاجەت دەپ ەسەپتەيمىز.
بۇل، تورعاي ءوڭىرىنىڭ ودان ءارى دامۋىنا ىقپال ەتەدى! وسىعان بايلانىستى، جاقىن ارادا، ارقالىق قالاسىندا ءتيىستى مەملەكەتتىك ورگانداردىڭ وكىلدەرىنىڭ قاتىسۋىمەن - ارنايى جيىن وتكىزۋدى ۇسىنامىن.
سونىمەن قاتار، ءوزىڭىز بىلەتىندەي، بيىلعى جىلى يۋنەسكو دەڭگەيىندە اتالىپ وتەيىن دەپ وتىرعان ۇلت ۇستازى – احمەت بايتۇرسىنۇلىنىڭ مەرەيتويىندا لايىقتى تۇردە اتاپ وتەمىز دەپ سەنەمىز!
وسى اتالعان ءىس شارالاردى قولداۋلارىڭىزدى سۇرايمىن!
بەرىك ابدىعاليۇلى
