نازارباەۆتىڭ ۇلكەن نەمەرەسى يەلىك ەتەتىن ءىرى كومپانيا تاراتىلا ما؟

1843
Adyrna.kz Telegram

ەكونوميكانى مونوپولياسىزداندىرۋ جونىندەگى كوميسسيا وتىرىسىندا ەلىمىزدەگى تىركەلگەن جانە ۇيالى بايلانىستىڭ يەلەنگەن ۇلەسى تۋرالى ماسەلە قارالدى، دەپ حابارلايدى “ادىرنا” ۇلتتىق پورتالى Orda.kz سايتىنا سىلتەمە جاساپ.

«قازاقتەلەكوم» اق تىركەلگەن بايلانىس نارىعىندا 80 پايىزدان استام جانە ۇيالى بايلانىس نارىعىندا 60 پايىزدان استام ۇلەسى بار تەلەكوممۋنيكاتسيا قىزمەتتەرى نارىعىندا مونوپوليست بولىپ تابىلادى.

«Kcell مەن Tele2 بىرىكتىرۋ كەزىندە ولاردىڭ جەلىلەرىن وڭتايلاندىرۋ جانە بىرىكتىرۋ ارقىلى وڭ ناتيجەگە قول جەتكىزۋ ماقساتى قويىلدى. بۇل كورسەتىلەتىن تەلەكوممۋنيكاتسيا قىزمەتتەرىنىڭ ساپاسىن ارتتىرۋعا مۇمكىندىك بەرەدى. الايدا 3 جىلدان بەرى ۇيالى بايلانىس وپەراتورلارىنىڭ جەلىلەرىن بىرىكتىرۋ جۇزەگە اسىرىلماي كەلەدى» دەلىنگەن پرەمەر-ءمينيستردىڭ سايتىندا.

شەشىم رەتىندە توپتىڭ ۇيالى بايلانىس وپەراتورلارىنىڭ ءبىرىن باسەكەلەس نارىققا شىعارۋ ۇسىنىلدى.

بايلانىس ساپاسىن باقىلاۋ تەتىگىن جەتىلدىرۋ بويىنشا ۇسىنىستار اياسىندا مونيتورينگ كۇشەيتىلىپ، ساپاسىز قىزمەت كورسەتكەنى ءۇشىن ايىپپۇل مولشەرى 100-دەن 1000 اەك-كە دەيىن وسەدى.

كوميسسيا وتىرىسىندا باس پروكۋراتۋرا مەن قارجى مونيتورينگى اگەنتتىگىنە «كسەلل» اق-نىڭ 24 پايىزىن ساتۋ جونىندەگى مامىلە ناتيجەسىندە مەملەكەتكە كەلتىرىلۋى مۇمكىن زالال ماسەلەسىن زەردەلەۋ ۇسىنىلدى.

سونىمەن قاتار، كوميسسيا وتىرىسىندا «ترانستەلەكوم» اق اكتسيالارىنىڭ جەكە تۇلعالارعا ساتىلۋىن،يەلىكتەن شىعارۋ كەزىندە مەملەكەتكە كەلتىرىلۋى مۇمكىن زالالدى تالداۋعا ۇسىنىس جاسالدى.

ايتا كەتسەك، «ترانستەلەكوم» اق-نىڭ نەگىزگى اكتسيونەرى نۇرسۇلتان نازارباەۆتىڭ ۇلكەن نەمەرەسى – ءنۇرالى اليەۆ.

«ترانستەلەكوم» اق-نىڭ مالىمەتتەردى وڭدەۋ ورتالىقتارىنىڭ ينجەنەرلىك ينفراقۇرىلىمىنا قاتىستى تاريفتەرىنىڭ نەگىزدىلىگىنە تالداۋ جاساۋ، سونداي-اق «ترانستەلەكوم» اق-نىڭ قازاقستان مەن ءازىربايجان اراسىنداعى ۇكىمەتارالىق كەلىسىمدە ايقىندالعان ايرىقشا قۇقىعىن الىپ تاستاۋ بويىنشا جۇمىستى جالعاستىرۋ ۇسىنىلدى.

ءاليحان سمايىلوۆ ICRIAP-قا جوعارىدا اتالعان بىرلەسكەن جوبا اياسىندا قازاقستاندىق وپەراتوردى اۋىستىرۋ بويىنشا ازىربايجاندىق تاراپپەن كەلىسسوزدەر جۇرگىزۋدى تاپسىردى.

”ادىرنا” ۇلتتىق پورتالى

پىكىرلەر