Talǵar qalasynyń ákimi bolyp saılanǵan Qaırat Isabaev qyzmetinen ketti, - dep habarlaıdy "Adyrna" tilshisi.
Sheneýniktiń ketkeni týraly aqparat áleýmettik jelilerde paıda boldy. Resmı jaýap alý úshin habarlasqan tilshilerge:
"Aýdan ákimdiginiń bul iske qatysty pikir bildirýge quqyǵy joq, óıtkeni Qaırat Isabaev halyq daýysy arqyly saılanǵan. Sondyqtan Talǵar aýdanynyń aýmaqtyq saılaý komıssııasyna ótinishińizdi joldaýyńyzdy suraımyz", - dep jaýap berdi ákimdiktegiler.
Al, saılaý komıssııasynyń tóraǵasy Muhıt Dıýsebaev bul aqparatqa qatysty pikir bildirdi.
"Keshe, 5 sáýirde Qaırat Isabaev óz ótinishi boıynsha qyzmetinen ketý týraly aryz jazdy. Ol densaýlyq jaǵdaıyna baılanysty ornynan ketýge májbúr boldy. Onyń ókilettigin toqtatý týraly sheshim búgin, 6 sáýirde shyǵady", - dedi Dıýsebaev Talgarnewskz tilshisine.
Eske salaıyq, ótken jyldyń qarashasynda ótken qala ákimin saılaýda Qaırat Isabaev jeńiske jetken bolatyn. Ol kezde saılaýshylardyń 58 paıyzy daýys berdi, onyń ishinde Isabaev 53,5 paıyz daýysqa ıe boldy. Ákim laýazymyna barlyǵy úsh adam úmitker boldy. Basqa kandıdattar - Abzal Saǵymbekuly men Ulan Qyzaıbek sáıkesinshe 35,3 jáne 7,7 paıyz daýys jınady. Saılaýshylardyń 1,6 paıyzy barlyǵyna qarsy daýys berdi.
Qaırat Isabaev – hırýrg. Ákim saılaýynda jeńiske jetkenge deıin Qyzylqaırat aýylyndaǵy dárigerlik ambýlatorııanyń meńgerýshisi, Talǵar ortalyq aýdandyq aýrýhanasy dırektorynyń emdeý bólimi jónindegi orynbasary qyzmetterin atqarǵan.
"Adyrna" ulttyq portaly
