Vashıngton Kıevke Javelin ("Djavelın") atty tankige qarsy zymyrandar keshenin jetkizgenin rastady. Bul jańalyq tórt jyl boıy Ýkraına ulttyq armııasymen soǵysyp júrgen reseılik separaısterdi qoldap otyrǵan Máskeýdi alańdatyp tastaıdy dep oılaıtyndar jeterlik.
30 sáýirde AQSh memlekettik departamentiniń resmı ókili Azat Eýropa/Azattyq Radıosynyń saýalyna: "Qarý áldeqashan jetkizildi" dep jaýap berdi.
Vashıngtonda Ýkraınaǵa atalǵan qarýdy satýǵa qatysty másele kóp talqylanǵan. Basynda AQSh prezıdenti Donald Tramp zymyran keshenin berýge qulyqsyz bolǵan. Byltyrǵy jeltoqsan aıynda ǵana Aq úı Kıevke Javelin satýdy maquldaǵan. Ýkraına prezıdenti Petr Poroshenko AQSh-pen jáne Batys Eýropa elderimen áskerı qarý-jaraq pen qural-jabdyq alý týraly únemi kelissóz júrgizip keledi.
Aty-jónderin atamaýdy qalaǵan biri AQSh-taǵy, ekinshisi Ýkraınadaǵy eki derek kózi Azattyqqa Aq úı resmı málimdegenge deıin Javelin-niń Ýkraınaǵa jetkizilgenin rastaǵan edi. Qarýdyń qashan jetkizilgeni, ýkraınalyq áskerılerdiń ol qarýdy qoldanýdy qaıtip úırenip jatqany jaıynda ázirge naqty derek joq. AQSh memlekettik departamenti basqa aqparatpen bólispedi. Al Ýkraına prezıdentiniń ákimshiligi qarýdyń kelýine qatysty eshqandaı málimet bermedi.
Byltyr AQSh memlekettik departamentiniń baspasóz-hatshysy Hızer Noıert AQSh-tyń Ýkraınaǵa "táýelsizdigin qorǵaýy, terrıtorııalyq tutastyǵyn saqtaýy jáne odan ary agressııaǵa qarsy turýy úshin áskerı kómek qylatynyn" habarlaǵan.
Bul sheshimge qatysty Reseıdiń syrtqy ister mınıstriniń orynbasary Sergeı Rıabkov AQSh-ty "soǵys órtin tutatyp otyr" dep aıyptaǵan.
Kıev pen Batys memleketteri Ýkraınanyń shyǵysyndaǵy separatısterdi Reseı qarýlandyryp otyr dep sanaıdy. Reseı Ýkraınanyń quramyndaǵy Qyrym avtonomııalyq respýblıkasyn 2014 jyldyń naýryzynda anneksııalap alǵan bolatyn.
Byltyr AQSh Kıevke quny 47 mıllıon dollarlyq áskerı kómek berý týraly sheshim qabyldap, ol naýryz aıynda bekitilgen. Bul járdemniń ishine Javelin atty tankke qarsy 210 zymyran kesheni kirgen.
2015 jyldan beri AQSh Ýkraınaǵa jalpy somasy 750 mıllıon dollar bolatyn áskerı qural-jabdyq bergen. Olardyń qatarynda túnde kórýge arnalǵan qurylǵylar jáne shaǵyn radıýsta jumys isteıtin radıolokaııalyq júıe de bar.
_______________________________________________________________________________________________________________________________
azattyq.org
