Vaşington Kievke Javelin ("Djavelin") atty tankıge qarsy zymyrandar keşenın jetkızgenın rastady. Būl jaŋalyq tört jyl boiy Ukraina ūlttyq armiiasymen soǧysyp jürgen reseilık separaisterdı qoldap otyrǧan Mäskeudı alaŋdatyp tastaidy dep oilaityndar jeterlık.
30 säuırde AQŞ memlekettık departamentınıŋ resmi ökılı Azat Europa/Azattyq Radiosynyŋ saualyna: "Qaru äldeqaşan jetkızıldı" dep jauap berdı.
Vaşingtonda Ukrainaǧa atalǧan qarudy satuǧa qatysty mäsele köp talqylanǧan. Basynda AQŞ prezidentı Donald Tramp zymyran keşenın beruge qūlyqsyz bolǧan. Byltyrǧy jeltoqsan aiynda ǧana Aq üi Kievke Javelin satudy maqūldaǧan. Ukraina prezidentı Petr Poroşenko AQŞ-pen jäne Batys Europa elderımen äskeri qaru-jaraq pen qūral-jabdyq alu turaly ünemı kelıssöz jürgızıp keledı.
Aty-jönderın atamaudy qalaǧan bırı AQŞ-taǧy, ekınşısı Ukrainadaǧy ekı derek közı Azattyqqa Aq üi resmi mälımdegenge deiın Javelin-nıŋ Ukrainaǧa jetkızılgenın rastaǧan edı. Qarudyŋ qaşan jetkızılgenı, ukrainalyq äskerilerdıŋ ol qarudy qoldanudy qaitıp üirenıp jatqany jaiynda äzırge naqty derek joq. AQŞ memlekettık departamentı basqa aqparatpen bölıspedı. Al Ukraina prezidentınıŋ äkımşılıgı qarudyŋ keluıne qatysty eşqandai mälımet bermedı.
Byltyr AQŞ memlekettık departamentınıŋ baspasöz-hatşysy Hizer Noiert AQŞ-tyŋ Ukrainaǧa "täuelsızdıgın qorǧauy, territoriialyq tūtastyǧyn saqtauy jäne odan ary agressiiaǧa qarsy tūruy üşın äskeri kömek qylatynyn" habarlaǧan.
Būl şeşımge qatysty Reseidıŋ syrtqy ıster ministrınıŋ orynbasary Sergei Riabkov AQŞ-ty "soǧys örtın tūtatyp otyr" dep aiyptaǧan.
Kiev pen Batys memleketterı Ukrainanyŋ şyǧysyndaǧy separatisterdı Resei qarulandyryp otyr dep sanaidy. Resei Ukrainanyŋ qūramyndaǧy Qyrym avtonomiialyq respublikasyn 2014 jyldyŋ nauryzynda anneksiialap alǧan bolatyn.
Byltyr AQŞ Kievke qūny 47 million dollarlyq äskeri kömek beru turaly şeşım qabyldap, ol nauryz aiynda bekıtılgen. Būl järdemnıŋ ışıne Javelin atty tankke qarsy 210 zymyran keşenı kırgen.
2015 jyldan berı AQŞ Ukrainaǧa jalpy somasy 750 million dollar bolatyn äskeri qūral-jabdyq bergen. Olardyŋ qatarynda tünde köruge arnalǧan qūrylǧylar jäne şaǧyn radiusta jūmys ısteitın radiolokasiialyq jüie de bar.
_______________________________________________________________________________________________________________________________
azattyq.org
Ūqsas jaŋalyqtar
