شىمكەنت قالاسىندا 2021 جىلى اۋىزسۋمەن قامتۋ ءۇشىن 3 ماگيسترالدى سۋاققى مەن 10 ەلدى مەكەندە قۇرىلىس اياقتالىپ، پايدالانۋعا بەرىلگەن. بۇل تۋرالى قالا اكىمى مۇرات ايتەنوۆ اباي اۋدانى تۇرعىندارىمەن كەزدەسۋىندە مالىمدەدى.
اۋىزسۋ ماسەلەسى تۇبەگەيلى شەشىمىن تاپقان ەلدى مەكەندەر: تۇران، اسار-2, سولتۇستىك ساياجاي، ىنتىماق-2, باتىس، جاڭاتۇرلان جانە اقتاس-2, جاڭاتالاپ، ساۋلە (276 ورام) جانە نۇرتاس شاعىن اۋداندارى. ناتيجەسىندە ساپالى سۋمەن قامتۋ كورسەتكىشى 95,6%-دان 98 پايىزعا جەتتى.
قالا اكىمى ءوز بايانداماسىندا بيىلعى اتقارىلاتىن جۇمىستارعا دا توقتالدى.
قازىر قالاداعى 81 ەلدى مەكەننىڭ 78-ءى اۋىزسۋمەن تولىق قامتىلعان، قۇرساي، سايرام جانە قايناربۇلاق تۇرعىن الابىنا سۋ كەستەمەن بەرىلەدى.
بيىل كەستەمەن سۋ الىپ وتىرعان ەلدى مەكەندەر مەن نۇرتاس سۋ جيناعىش ماگيسترالىنىڭ قۇرىلىسى جۇرەدى. جىل سوڭىنا دەيىن قۇرساي مەن ونىڭ جاڭاقۇرىلىس اۋماعى اۋىزسۋمەن قامتىلۋى جوسپارلانىپ وتىر.
ال، سايرام مەن قايناربۇلاق ت/ا جانە اسار 2-ءنىڭ جاڭاقۇرىلىسىنىڭ سۋمەن قامتىلۋى كەلەر جىلعا وتپەلى. الداعى جىلدىڭ جوسپارى بويىنشا 3 ماگيسترالدى سۋاققى سالىنىپ، قولدانىسقا بەرلەدى. ناتيجەسىندە 2023 جىلى شىمكەنت قالاسىنىڭ اۋىزسۋمەن قامتۋ كورسەتكىشى 100 پايىزعا جەتپەك.
