قازاقستاننىڭ ەكس-پرەزيدەنتى نۇرسۇلتان نازارباەۆتىڭ ۇلكەن قىزى داريعا نازارباەۆا مەن ونىڭ ۇلى ءنۇرالي اليەۆكە تيەسىلى دەلىنەتىن لوندون شەتىندەگى ءزاۋلىم ءۇي ساتىلىمعا شىعارىلدى، دەپ جازادى ازاتتىق. بۇل تۋرالى "ادىرنا" ۇلتتىق پورتالى حابارلايدى.
Winkworth ريەلتور كومپانياسىنىڭ سايتىندا جارىق كورگەن حابارلاندىرۋدا ءۇي تۋرالى جان-جاقتى ماعلۇمات بەرىلگەن. ءتورت قاباتتى ءۇي لوندونداعى جاسىل جەلەكتى اۋداندا، Highgate گولف-كلۋبىنىڭ تۇبىندە، ادام اياعى باسپايتىن Denewood Road تۇيىق جولىنىڭ تۇكپىرىندە ورىن تەپكەن.
11 ملن 800 مىڭ اقش دوللارىنا باعالانعان ۇيگە ەشقانداي قۇقىقتىق شەكتەۋ جوق ەكەنى، ەركىن ساۋداعا شىعارىلعانى حابارلانعان. ءۇيدى ساتىپ الۋ ماقساتىندا كورۋ ءۇشىن ارنايى فورمانى تولتىرىپ، بايلانىس تەلەفونىڭىزدى قالدىرۋىڭىز كەرەك. سايتتا ءۇيدى يپوتەكاعا الۋدىڭ جولدارى دا قاراستىرىلعان.
حابارلاندىرۋدان اۋماعى 765 شارشى مەتر بولاتىن ءۇيدىڭ ءار قاباتىنىڭ 3D كورىنىسىن كورىپ، ءار بولمەسىن جەكە تاماشالاۋعا بولادى. جەتى جاتىن بولمەسى، ءتورت قوناق بولمەسى مەن التى ۆانناسى بار ءۇيدىڭ فوتوگالەرەياسى دا قوسا بەرىلگەن. ءۇيدىڭ ىشىندە ۇلكەن باسسەين مەن بيليارد ۇستەلى بار، بارلىق بولمەسى قىمبات جيھازبەن جابدىقتالعان.
سايتتان ءۇيدىڭ كارتاداعى ورنالاسقان ورنىن، سپۋتنيكتەن قاراعانداعى كورىنىسىن بايقاۋعا بولادى.
"ادىرنا" ۇلتتىق پورتالى
